Відэаблогеру далі суткі за снежаньскія пратэсты восьмы раз запар. Агулам ён адсядзіць 120 дзён
Суддзя Таццяна Шоцік прысудзіла блогеру Дзмітрыю Казлову, вядомаму пад мянушкаю Шэры Кот, 15 сутак арышту за ўдзел у менскай акцыі супраць інтэграцыі з Расеяй 8 снежня, падае праваабарончы цэнтр «Вясна». Гэта ўжо восьмы арышт блогера за апошнія два месяцы.
Разгляд справы паводле часткі 3 арт. 23.34 КаАП адбыўся ў судзе Ленінскага раёну Менску 27 студзеня.
Сам Казлоў на пасяджэнні не з’явіўся, яго інтарэсы прадстаўляла адвакат. Яна заявіла адвод суддзі, але ён не быў задаволены.
Сведкамі выступілі міліцыянты Андрэй Ціханаў і Дзмітрый Каранеўскі. Першы адмаўляўся сказаць, як ён апазнаў Казлова. У рапарце было напісана, што асобу блогера вызначыў пазней, але ў судзе Ціханаў сказаў, што пазнаў блогера адразу. Шмат на якія пытанні міліцыянт адказваў «Не памятаю».
Ані Ціханаў, ані Каранеўскі не маглі назваць ніякіх дзеянняў удзельнікаў акцыі, якія парушалі б грамадскі парадак, акрамя таго, што яны там проста знаходзіліся.
Адвакат у выступе звярнула ўвагу суда на тое, што Казлоў рэалізоўваў свае правы, гарантаваныя Канстытуцыяй і Міжнародным пактам аб грамадзянскіх і палітычных правах, але гэта ніяк не паўплывала на вынік суда.
Дзмітрый Казлоў вырашыў стаць відэаблогерам пасля «маршаў недармаедаў» у 2017-м годзе. Папулярнасць ягоны канал займеў пасля наўпроставых трансляцыяў з менскіх акцый пратэсту супраць інтэграцыі з Расеяй. Падчас арыштаў у ізалятары хлопец хваляваўся, што страціць частку падпісчыкаў праз адсутнасць у інтэрнэце, але атрымалася наадварот: колькасць падпісчыкаў ягонага стала расце.
27 студзеня адбыліся таксама суды над іншымі ўдзельнікам антыінтэграцыйных акцыяў.
Суддзя Аляксей Кісляк з суд Ленінскага раёну прысудзіў Мікалаю Статкевічу штраф Br 1350 рублёў за акцыю 20 снежня, а Андрэю Кудзіку – штраф Br 1080 рублёў за акцыю 8 снежня.
Суддзя Максім Трусевіч з суду Першамайскага раёну даў штраф штраф Br 1350 рублёў за ўдзел у акцыі 20 снежня ў Менску Дзіяне Серадзюк.
Суддзя суду Цэнтральнага раёну Менску Таццяна Акавіта дала штраф Br 810 Пятру Садоўскаму за акцыю 7 снежня, а Іван Касцян з гэтага ж суду пакараў такім ж штрафам Лявона Баршчэўскага.
ДД belsat.eu
