Палітвязнем праваабаронцы хацелі абвесціць блогера Змітра Казлова, больш вядомага як Шэры Кот. Пакараны на 90 содняў арышту за ўдзел у антыінтэграцыйных акцыях, маладзён нечакана і толькі часова выйшаў на волю, бо ў аршанскім ізалятары праводзяць дэзынфекцыю…
Неспадзявана выйшаў на волю і свой стрым назваў «З Калядамі і Новым Годам!», бо для яго святы толькі пачынаюцца. У Аршанскім ІЧУ блогер Зміцер Казлоў, больш вядомы як Шэры Кот апынуўся 24 снежня. Ідучы дамоў пасля вызвалення, марыў:
«Прыйсці, памыцца, адпачыць і прачытаць паведамленні. Мне, блогеру, трэба даведацца, што мне пісалі, і паглядзець навіны. Бо я месяц быў у ізаляцыі і не ведаю, што ў свеце адбываецца – якія былі мітынгі, каго пасадзілі, каго адпусцілі, як Лукашэнка, што Пуцін».
Глядзіце сюжэт у выданні «Аб’ектыву»:
Ужо сёння вярнуўся да грамадскага жыцця, хоць «неадседжанымі» засталіся яшчэ два тэрміны. Таму турэмнае «сабойкі» Зміцер не разбірае, як і некалькі іншых актывістаў, якія выйшлі з ізалятараў з не адбытымі да канца тэрмінамі – за заклікі, арганізацыю ці ўдзел у мітынгах супраць інтэграцыі з Расеяй. Шэры Кот перакананы, што здарма:
«Могуць, напрыклад, на тыдзень «закрыць» на Дзень Волі, яшчэ некалі. А потым на месяц у жніўні, каб прайшлі выбары «спакойна».
Кодэкс аб адміністрацыйных правапарушэннях дазваляе суду караць парушальніка на 15 содняў арышту паводле аднаго пратаколу. Калі пратаколаў некалькі – максімальнае пакаранне 25 содняў. Гэта 6 пратаколаў супраць аршанскага блогера. Правіла іх сумавання суд праігнараваў: паводле кожнага прысудзіў 15 содняў.
Праваабаронца Павел Левінаў, які апекаваўся арыштаваным на працягу месяца, абураецца:
«Любое пакаранне мае быць гуманным. 90 содняў паводле адміністрацыйнага працэсу – ні пра якую гуманізацыю тут не вядзецца. За крымінальныя злачынствы часам сядзяць 90 дзён».
Гэта ўдвая большы тэрмін, чымся для арганізатара акцыяў у сталіцы Паўла Севярынца. Згодна з судовымі пастановамі, за краты Казлоў трапіў за публічныя заклікі да правядзення пратэстаў у снежні і публікацыю гэтых заклікаў на сваіх акаўнтах у сацыяльных сетках.
«Пакуль вы рабілі са мною інтэрв’ю, на мой канал падпісалася яшчэ 100 чалавек, якія хочуць ведаць праўду пра тое, што адбываецца ў Беларусі», – кажа Шэры Кот.
Гэта і ёсць прычына пераследу апазіцыйных блогераў, лічыць намеснік старшыні «Беларускай Асацыяцыі журналістаў» Барыс Гарэцкі:
«Такія людзі як Шэры Кот, Сяргей Ціханоўскі, Сяргей Пятрухін – блогеры, найбольш небяспечныя для ўлады. Гэта новы від актывізму – інтэрнэт-актывізм. Для ўлады гэта небяспека, калі блізкі з аўдыторыяй блогер заклікае моладзь на нейкія акцыі, моладзь паслухае гэтага блогера».
У снежні, у дні, калі чакалася падпісанне Лукашэнкам і Пуціным інтэграцыйных дакументаў, вялікую частку пратэставай хвалі складала моладзь. Праваабаронцы заклікаюць уладу не караць за мірныя акцыі ў абарону суверэнітэту.
Судзілі з паўсотні ўдзельнікаў акцыяў. За кратамі Новы год сустракалі 10 асобаў. Усе яны дадаткова маюць заплаціць ізалятарам за ўтрыманне – Br 13,5 рублёў велічыні за содні. Рахунак Змітра Казлова на сённяшні дзень складае Br 332 рублі. Апроч гэтага:
«Невядома, што мне за 30 дзён у кватэру маглі падкінуць. Міліцыянты мелі ключы, і на працягу 30 дзён маглі зрабіць што заўгодна. Я ж не ведаю… нехта мне нават пісаў: апасайся правакацыяў. Заўтра можа прыйдуць і заявяць – вось ты тут гандлюеш», – гаворыць Зміцер.
Нягледзячы на ціск, блогер Шэры Кот вярнуўся на сваю тэрыторыю і будзе працаваць з інфармацыяй як раней.
Юлія Цяльпук belsat.eu