У траўні ў Беларусі з’явіўся самы працяглы і паводле часу, і паводле працягласці чыгуначны маршрут. Яго з’яўленне не проста стала рэкордным для краіны, але і спрычынілася да праблемаў з працай у чыгуначнікаў.
З 18 траўня ў Беларусі пачаў хадзіць новы цягнік № 606/605 «Берасце-Цэнтральнае – Полацк», які раней спыняўся ў Віцебску. Шлях з Берасця да Полацку ён праходзіць за 19 гадзін 12 хвілін, назад – за 17 гадзін 51 хвіліну. За гэты час ён праходзіць 893 кіламетры.
Таксама маршрут аб’ядналі з саставам № 601/602 «Полацк – Гомель». І калі раней адлегласць паміж гарадамі можна было праехаць за 7 гадзін, то цяпер – на гэта спатрэбіцца ўдвая больш часу.
Але працаўнікі Віцебскага вагоннага ўчастку лічаць з’яўленне такога цягніка эканамічна немэтазгодным. Афіцыйны берасцейскі цягнік працягнулі з Віцебску да Полацку з прычыны эпідэміі каронавіруса і падзення праз гэта пасажырскай плыні. Віцебскія ж чыгуначнікі бачаць у такім рашэнні карупцыйны складнік.
У сваім звароце да Міністэрства транспарту, які ёсць у рэдакцыі «Белсату», яны адзначаюць, што пасля запуску цягніка яшчэ і да Полацку колькасць пасажыраў вырасла толькі на 2 %, бо амаль усе з іх едуць выключна да Віцебску, дзе шмат прадпрыемстваў і навучальных установаў.
«Увесь асноўны пасажырапаток ідзе менавіта да нашага гораду, далей рухомы састаў ідзе з абсалютна пустымі вагонамі, а гэта штодзённы пусты прабег вагонаў ад ст. Віцебск да ст. Полацк (~ 102 км) у адзін бок, плюс выдаткі на лакаматыў», – адзначаюць у звароце.
Чыгуначнікі адзначаюць, што гэта было вядома і раней, бо гадамі пустым з Віцебску да Полацку ходзіць цягнік «Полацк – Масква». На іх думку, эканамічна выгадным было б перагледзець схемы руху асноўных цягнікоў з Полацку да Віцебску і арганізаваць прычапныя вагоны замест працягнення ўсяго маршруту.
Пра тое, што цягнік «Полацк – Берасце» да Віцебску ходзіць амаль пустым, пацвярджаюць і апытаныя 9 чэрвеня карэспандэнтам «Белсату» пасажыры. З Полацку ў Віцебск цягнік прыйшоў а 16:23, але выйшла з яго не больш за 10 чалавек.
«Не ведаю, колькі ўсяго ў цягніку пасажыраў. Але ў мяне ў вагоне толькі 2 чалавекі былі ад Полацку да Віцебску», – адзначыла правадніца аднаго з вагонаў.
«Пустыя вагоны. Без сэнсу катаюцца вагоны, ні для каго», – заявіў у сваю чаргу адзін з пасажыраў.
«Зусім мала людзей у цягніку, чалавек 8 максімум на цэлы плацкартны вагон», – дадаў іншы.
Але пустыя цягнікі – далёка не адзіная заўвага, якая ёсць у працаўнікоў Віцебскага вагоннага ўчастку. Разам з працягненнем цягніка да Полацку ягонае абслугоўванне перадалі мясцовым праваднікам, хаця больш за 30 гадоў гэтым займаліся віцебскія.
«Тым самым яны фактычна пакінулі прыкладна 300 чалавек працоўнага калектыву [Віцебскага вагоннага ўчастку. – Рэд. Belsat.eu] без працы», – гаворыцца ў звароце.
Адна з працаўніц з Віцебску ў каментары карэспандэнту «Белсату» адзначыла, што спачатку заяўлялася, што гэтая мера часовая – на перыяд падзення пасажырапатоку з прычыну каронавіруса. Але пасля апошняй селектарнай нарады стала зразумела, што гэта не так.
Зараз працаўнікам віцебскага ўчастку ўрэзалі прэміі, большую частку з іх «паслалі на прастой».
«Нас заганяюць на незразумелыя працы. Некуды хадзіць у гаспадарку, як кажуць, нашу на прыбіранне, фарбаванне і гэтак далей», – заявіла правадніца.
Астатнім часам прапануюць ездзіць на працу з Віцебску ў Полацк, дзе сваіх працаўнікоў не хапае для абслугоўвання цягніка, але час на дарогу паміж гарадамі не аплочваецца.
Кіраўніцтва прафсаюзу дапамагчы віцебскім чыгуначнікам таксама не можа ці не хоча. Паводле неафіцыйных звестак, прафсаюзу даручана зрабіць так, каб «людзі маўчалі, хаця б да выбараў».
«А пасля выбараў мы ўжо нічога не адстаім. Пісалі скаргі, звароты, але пасля ніхто не пагадзіўся асабліва дапамагчы», – заявіла суразмоўца.
Паводле яе, у прафсаюзе заяўляюць, што ніхто не будзе звольнены, але «непатрэбныя кадры натуральным адтокам будуць адсеяныя».
«А як быць людзям, у якіх і дзеці маленькія ёсць? І пенсійны стаж да канца не выпрацаваны? Дый зараз проста ўладкавацца на працу вельмі цяжка. Столькі гадоў адпрацавалі… І зараз вельмі крыўдна тое, што адбываецца. <…> Гэта ўсё адбываецца нахабна, адкрыта. Складваецца ўражанне, што гэта ўсё пакрываецца ў вярхах. Мы засталіся на гэтай сцежцы вайны сам-насам», – адзначыла правадніца.
Паводле яе, людзі ўжо гатовыя скінуцца грашыма, каб камусьці заплаціць і застацца з працай.
«Мы ў адкрытую сказалі, што калі мы нічога не даб’емся, хаця б мінімальнага, каб застацца на працы, будзем афіцыйную паперу пісаць у адміністрацыю прэзідэнта ці самому прэзідэнту. Калі ў нас нахабна, інакш не скажаш, проста адціснулі працу», – дадала правадніца.
Каб атрымаць афіцыйны каментар пра прычыны прыняцця апісаных вышэй рашэнняў і адносна будучага лёсу працаўнікоў Віцебскага вагоннага ўчастку, мы звярнуліся ў прэс-службу Беларускай чыгункі. Там параілі напісаць афіцыйны зварот. Пра вынікі адказу на наш зварот мы паведамім пазней.
МГ belsat.eu