Прэзідэнт ЗША намінаваў спецыялістку ў еўрапейскіх пытаннях Джулі Фішэр амбасадаркай Беларусі, падае прэс-служба Белага дому. Цяпер яе кандыдатура патрабуе зацверджання ў Сенаце ЗША.
У панядзелак, 20 красавіка, Дональд Трамп заявіў пра намер вылучыць на пасаду надзвычайнага і паўнамоцнага амбасадара Злучаных Штатаў Амерыкі ў Беларусі Джулі Фішэр, якая служыць цяпер на пасадзе намесніка памочніка дзяржсакратара па пытаннях Заходняй Еўропы і Еўрапейскага звязу.
Джулі Фішэр атрымала дыплом магістра ў Цэнтры Ўілсана Прынстанскага ўніверсітэту і вывучала праблематыку Расеі і Усходняй Еўропы ва Універсітэце Паўночнай Караліны.
У 2011–2013 гадах Фішэр служыла намесніцаю дырэктара офісу генеральнага сакратара NATO, дзе займалася пытаннямі Паўночнай Амерыкі, балтыйскіх краінаў, аперацыйнай палітыкай ды пытаннямі абароны і стрымлівання.
У яе паслужным спісе – праца ў амбасадах ЗША ў Тбілісі, Кіеве і Маскве.
Дыпламатка валодае расейскай, французскай і трошкі гаворыць па-грузінску.
Каб узначаліць амбасаду ў Беларусі, дыпламатцы спатрэбіцца зацверджанне яе кандыдатуры верхняй палатай амерыканскага парламенту. AFP падае, што вылучэнне Фішэр не выклікала негатыўнай рэакцыі ў амерыканскіх заканадаўцаў, але калі адбудзецца зацверджанне яе кандыдатуры, невядома: пакуль сенатары застаюцца на вымушаных канікулах праз эпідэмію каронавіруса.
Пра абмен пасламі Беларусь і ЗША заявілі ўлетку 2019-га. Дзяржсакратар ЗША Майкл Пампэа падчас візіту ў Менску 1 лютага пацвердзіў хуткае прызначэнне амбасадара.
У Беларусі амбасадара ЗША няма з 2008 года.
ДД belsat.eu