«Еўпаторыя», «АУ», «Яблыні» ды іншыя ювелірныя гіты і шлягеры ў выкананні гурта «Ляпіс-98» увечары пятніцы прагучалі ў Варшаве. На выступ беларусаў у польскай сталіцы прыйшлі як суайчыннікі, гэтак і прыхільнікі з Украіны і Польшчы.
Варшаўскі клуб «Прагрэсія» быў запоўнены амаль цалкам. Людзі розных узростаў, некаторыя нават з дзецьмі, танчылі ды спявалі пад песні 90-ых з ашалелым запалам. Міхалок у сваю чаргу са сцэны чытаў вершы, распавядаў аб прыгодах «Ляпісаў» пачатку нулявых. Не прапусціў ён і магчымасці падзяліцца навінамі са свайго жыцця.
«Вы думаеце, што я стаў чалавекам, калі перастаў піць. Не, я быў чалавекам, калі піў!» – пажартаваў музыка, і людзі адказалі смехам ды сакавітымі воплескамі.
Наступныя выступленні «Ляпісу-98» адбудуцца ў Вроцлаве, Празе, Познані, Кракаве і Парыжы. Улетку гурт таксама зайграе канцэрты ва Украіне і Беларусі. Тур культавага «Ляпісу-98» скончыцца канцэртам ва ўкраінскім Севераданецку ў кастрычніку.
Юлія Шаблоўская belsat.eu
