У Сенаце ЗША 16 студзеня, афіцыйна пачаўся працэс імпічменту прэзідэнта Доналда Трампа. Пра гэта паведамляе DW. Трампа вінавацяць у злоўжыванні службовымі паўнамоцтвамі і перашкоды ў працы Кангрэсу.
Прэзідэнту ЗША ставяць у віну тое, што ён патрабаваў ад Украіны правесці расследаванне ў дачыненні да свайго верагоднага суперніка на будучых прэзідэнцкіх выбарах Джо Байдэна і для аказання ціску на Кіеў прыпыніў ваенную дапамогу Украіне на $ 391 млн. Таксама дэмакраты мяркуюць, што Трамп перашкаджаў Палаце прадстаўнікоў расследаваць гэта.
Разгляд канкрэтных абвінавачванняў пачнецца 21 студзеня.
Рашэнне аб імпічменце Трампа будуць прымаць 100 сенатараў. Каб абвесціць імпічмент, неабходна, каб гэтае рашэнне падтрымалі дзве траціны сенатараў. Эксперты лічаць гэта малаверагодным, бо ў Сенаце большасць належыць рэспубліканцам.
У Палаце прадстаўнікоў за імпічмент галасавалі дэмакраты, якія маюць там большасць.
Трамп стаў трэцім прэзідэнтам у гісторыі ЗША (пасля Эндру Джонсана ў 1868-м і Біла Клінтана ў 1998-м), якому быў абвешчаны імпічмент Палатай прадстаўнікоў Кангрэса. Аднак яшчэ ніколі імпічменту не падтрымліваў Сенат.
МГ belsat.eu