Да грамадскай актывісткі са Слаўгарада Анжалікі Калатазішвілі ўвечары 11 чэрвеня прыйшлі супрацоўнікі аддзелу ўнутраных спраў, піша MSPRING.ONLINE.
Нагодай для візіту міліцыянтаў стала публікацыя актывісткі ў «Аднакласніках» за 25 кастрычніка 2019 года. Жанчына апублікавала сабе на старонку фільм NEXTA «Лукашэнка. Крымінальныя матэрыялы».
«Міліцыянты склалі пратакол апытання, цікавіліся, што я размяшчаю ў сваіх сацсетках і навошта. Пыталіся, чым мне спадабаўся гэты фільм. Я шчыра сказала, што я не падтрымліваю існуючую ўладу ў Беларусі і што хтосьці, відавочна, наклаў у штаны», – распавяла Калатазішвілі.
Паводле яе, сілавікі папярэдзілі, што прыедуць яшчэ раз.
Анжаліка Калатазішвілі ў 2014 годзе атрымала інваліднасць праз памылку лекараў, якія доўгі час не маглі правільна дыягнаставаць яе захворванне і выдалілі ёй здаровыя органы. Пасля жанчына неаднаразова звярталася ў праваахоўныя органы і розныя інстанцыі з патрабаваннямі прыцягнуць вінаватых да адказнасці, стала крытыкаваць мясцовыя і рэспубліканскія ўлады.
На думку праваабаронцы Сашы Райкана, сілавікі спрабуюць запалохаць жанчыну.
Пры гэтым ён адзначыў, што рэпост быў зроблены ў кастрычніку 2019 года, а нібыта экстрэмісцкім фільм NEXTA прызналі толькі ў снежні.
МГ belsat.eu