Расейская дэлегацыя на канферэнцыі АБСЕ ў Варшаве на тэму правоў чалавека дапусціла памылку, якая звярнула ўвагу многіх палітыкаў і журналістаў ува Украіне.
«На міжнароднай канферэнцыі АБСЕ, прысвечанай свабодзе слова, прадстаўнік расейскай дэлегацыі ў выступе заклікаў пакараць Украіну за забойства Шарыя!», – напісала ў «Фэйсбуку» украінская журналістка Вольга Лень.
Журналістка засумнявалася, ці не рыхтуецца «новае злачынства Кіеўскай хунты».
Памылку заўважыў таксама прысутны на паседжанні гісторык і блогер Юрый Гудыменка.
На заседании ОБСЕ российская делегация потребовала наказать Украину за убийство Анатолия Шария.
ШАРИЯ.
Нет, не шутка. Это они с Шереметом так эпично перепутали.
Где-то в Голландии зафиксировано резкое сжатие чёрной дыры.
— Юрій Гудименко (@hudymenko_yuriy) September 11, 2018
Народны дэпутат Украіны Аляксей Ганчарэнка ад Блоку Пятра Парашэнкі параіў Шарыю задумацца.
«Нашыя «суседзі», хутчэй за ўсё, не прозвішчы, а аркушы пераблыталі», – напісаў Ганчарэнка.
Паводле sharij.net, журналіста задумвацца «не збіраецца».
Скандальна вядомы блогер Анатоль Шарый збег з Украіны яшчэ ў часы Віктара Януковіча. Сцвярджае, што яго там пераследавалі за журналісцкую дзейнасць: Шарый – аўтар папулярнага відэаблогу, у якім выкрываў злоўжыванні ў органах улады, а пасля перамогі Еўрамайдану пачаў бязлітасна крытыкаваць цяперашнія палітычныя рэаліі ў сваёй краіне. У сваю чаргу, ува Украіне яго абвінавачваюць у педафіліі і інсцэнізацыі нападу на самога сябе.
Павел Шарамет – беларускі журналіст, які праз пераслед на радзіме спачатку працаваў у Расеі, а потым ува Украіне. Загінуў 20 ліпеня 2016 года ў выніку падрыву ягонага аўта.
ДД