Улады Беларусі прапрацоўваюць фармат працы ў справе імпарту амерыканскай нафты. Пра гэта 16 сакавіка паведаміў прэс-сакратар канцэрну «Белнафтахім» Аляксандр Цішчанка, перадае БелТА.
Аляксандр Цішчанка адзначыў, што магчымасць паставак у Беларусь нафты з ЗША не выключаецца і «фармат прапрацоўваецца». Паводле яго, гаворка ідзе аб фармаванні перамоўных пазіцыяў.
Таксама працягваецца праца адносна аднаўлення трубаправодных паставак нафты з балтыйскіх партоў у Беларусь.
Аляксандр Цішчанка дадаў, што канцэрн робіць усё, каб на фоне ваганняў сусветных коштаў на нафту выгадна яе купіць.
«Рынак мы кантралюем, вывучаем і працуем з усімі магчымымі пастаўшчыкамі», – сказаў ён і дадаў, што «на сёння буйных здзелак па новых коштах яшчэ не зафіксавана».
Між тым у Беларусь працягваюцца пастаўкі альтэрнатыўнай нафты. Гэтак, 17 сакавіка ў Клайпеду мусіць прыйсці яшчэ адзін танкер з 80 тыс. тонаў нафты.
Апроч таго, 15 сакавіка другі танкер з азербайджанскай нафтай прышвартаваўся ў адэскім порце «Паўднёвы» і стаў на сліў. Прапампоўка нафты з першага танкера ў напрамку Мазырскага НПЗ ужо пачалася, яна паступіць на завод для перапрацоўкі на гэтым тыдні.
1 лютага дзяржаўны сакратар ЗША Майк Пампэа паабяцаў забяспечваць Беларусь нафтай на 100 %. Пазней кіраўнік Беларусі заявіў, што прасіў Пампэа «дапамагчы нам [Беларусі] з інфраструктурай і пастаўкамі нафты».
13 сакавіка адбылася тэлефонная размова міністра замежных справаў Беларусі Уладзіміра Макея з Майкам Пампэа. Яны абмеркавалі вынікі візіту 1 лютага, а таксама пытанні двухбаковай супрацы, рэгіянальнага і міжнароднага парадку дня ды тэматыку энергетычнай бяспекі.
МГ belsat.eu