Насуперак намаганням пажарнікаў агонь ужо ў дзвюх кіламетрах ад сховішча радыеактыўных адкідаў, заявіў чалец грамадскай рады пры Дзяржаўным агенцтве па кіраванні зонаю адчужэння (ДАЗВ) Яраслаў Емяльяненка ў «Фэйсбуку».
«Або да Кабміну не даносяць рэальную сітуацыю, або ён абраў палітыку замоўчвання савецкай улады, як у 86-м годзе, – напісаў Яраслаў Емяльяненка. – Агонь дабраўся да Прыпяці і знаходзіцца ў двух кіламетрах прама ад сховішчаў радыеактыўных адкідаў «Падлесны», дзе размешчаныя найбольш высокаактаўныя радыяцыйныя адкіды ўсёй Чарнобыльскай зоны, і з самой ЧАЭС».
Емяльяненка заяўляе пра адсутнасць належнай рэакцыі з боку ўраду і Дзяржаўнай службы надзвычайных сітуацыяў (ДСНС).
«Зайдзіце на старонкі Кабміна, ДСНС і профільных дзяржустановаў – у іх усё пад кантролем і ўсё нармальна. Недзе гарыць, але гэта ок. І тое, што гэтая серыя падпалаў, паводле ўсіх юрыдычных прыкметаў, з’яўляецца тэрарыстычным актам, які зараз выйдзе за межы краіны і стане міжнародным – гэта нармальна, не звяртайце ўвагі, сітуацыя штатная. На месца не дапускаюць валанцёраў і журналістаў», – дадаў ён.
Па стане вечар 13 красавіка, на тушэнні пажараў у зоне адчужэння задзейнічаныя 415 чалавек і 98 адзінак тэхнікі, у тым ліку авіяцыя, падае ДСНС.
Паводле ТСН, пажар у зоне адчужэння знішчыў, між іншага, прынамсі 12 закінутых вёсак і падабраўся да Чарнобыльскай АЭС.
Лясныя пажары ў Чарнобыльскай зоне цягнуцца ўжо тыдзень. Першыя 20 гектараў у зоне адчужэння загарэліся 4 красавіка каля вёскі Уладзіміраўка.
6 красавіка кіеўская паліцыя заявіла, што ў падпале травы, які прывёў да ляснога пажару, прызнаўся 27-гадовы жыхар вёскі Рагоўка.
Эксперты заяўляюць, што наўрад ці ў пажарах вінаваты адзін чалавек: маўляў, украінскія сяляне часта падпальваюць траву, каб яе не араць. Да гэтай праблемы дадалося таксама сёлетняе сухое надворʼе пасля бясснежнай зімы, а таксама агульная непадрыхтаванасць ратаўнікоў да тушэння лясных пажараў.
ДД belsat.eu