Чарговыя адмовы на правядзенне мітынгаў атрымалі 29 красавіка праціўнікі запуску акумулятарнага заводу і прадстаўнікі сацыял-дэмакратычнай партыі.
Раніцай 29 красавіка праціўнікі запуску акумулятарнага заводу заявілі ў сацыяльных сетках, што паведамілі ўладам аб правядзенні мітынгу ў Парку воінаў-інтэрнацыяналістаў 1 траўня. Але амаль адразу на сваім афіцыйным сайце Берасцейскі гарвыканкам заявіў, што мітынг забаронены, бо на гэтым месцы пройдуць іншыя мерапрымствы. Бакі сустрэліся ў гарвыканкаме – але так і не змаглі дамовіцца. Улады настаялі: мітынг забаронены. Актывісты ж не плануюць парушаць закон.
– Улады сказалі, што няма ніякай магчымасці правесці першага траўня мітынг. Я лічу, што парушана нашае права на мірныя сходы.У гарвыканкаме кажуць, што яны адправілі нам ліст аб забароне мітынгу 26 красавіка, але гэта занадта позна, мы павінны быць апавешчаныя за пяць дзён. І другі момант: няма ніякай магчымасці даведацца пра акцыі, якія праводзяць улады – на нашыя заяўкі яны адказваюць сваймі акцыямі і на гэтай падставе нам адмаўляюць, – заявіў «Белсату» праваабаронца Раман Кісляк.
Таксама заяўку на правядзенне ў цэнтры Берасця святочнага мітынгу і дэманстрацыі 1 траўня падаў кіраўнік Берасцейскай абласной арганізацыі Беларускай сацыял-дэмакратычнай партыі Ігар Маслоўскі. Правядзенне гэтага мерапрыемства гарадскія ўлады таксама забаранілі.
– Улады не хочуць чуць людзей, не паважаюць іх правы. Усе праблемы заганяюць у кут. Мы ў сваю чаргу заклікаем грамадзянаў быць салідарнымі і разам змагацца за лепшую долю, – сказаў «Белсату» Ігар Маслоўскі.
Тым часам, 29 красавіка выйшаў на свабоду адзін з лідараў ініцыятыўнай групы супраць будаўніцтва акумулятарнага заводу Зміцер Бекалюк – ён быў затрыманы 27 красавіка перад Вялікднём. Святы ён правёў у ІЧУ. Сёння, 29 красавіка, Бекалюка прывезлі ў суд, дзе ён папрасіў час на азнакамленне з матэрыяламі справы і на пошукі адваката. У выніку суд перанеслі на 11 траўня, а актывіста адпусцілі.
АС belsat.eu
