«Belzhd_live»: працаўнікоў Беларускай чыгункі пазбавяць права на бясплатны праезд
Супольнасць беларускіх чыгуначнікаў «Belzhd_live» паведамляе пра скасаванне значнай карпаратыўнай ільготы – права бясплатнага праезду на чыгунцы для працаўнікоў БЧ і пенсіянераў-чыгуначнікаў.
Паводле «Belzhd_live», 17 красавіка начальнікам БЧ быў падпісаны загад Nº119Н «Аб прыпыненні выдачы і дзеяння гадавых квіткоў формы 4». У адпаведнасці з загадам з 1 траўня «спыняецца выдача бясплатных (ільготных) праязных дакументаў работнікам і непрацуючым пенсіянерам БЧ гадавых квіткоў формы 4 для праезду па асабістых патрэбах». Пры гэтым ужо выдадзеныя гадавыя квіткі падлягаюць вяртанню па месцы іх выдачы.
«Сама гэта падзея і вельмі дзіўная тэрміновасць гэтага рашэння сведчыць аб адным: на БЧ фінансавая катастрофа, і яе начальніку трэба тэрмінова паказваць вышэйстаячым меры, якія прымаюцца», – зазначае супольнасць чыгуначнікаў.
Паводле «Belzhd_live», ільготы чыгуначнікаў заўсёды былі прадметам зайздрасці, незадаволенасці і папрокаў кіраўніцтву БЧ ад вышэйшых чыноўнікаў, бо, на іх думку, наяўнасць гэтых ільгот сама па сабе ставіць чыгуначнікаў у асобную «прывілеяваную касту».
Глеб Нержын belsat.eu
