У Горадні адкрылася выстава з працамі пераможцаў міжнароднага конкурсу «Сусветнае прэс-фота 2019». Сёлета выстава не даедзе да Менску, паглядзець экспазіцыю можна толькі ў гарадзенскім Цэнтры гарадскога жыцця, дзе 8 жніўня адбылося ўрачыстае адкрыццё.
Конкурс «World Press Photo» – самы прэстыжны ў свеце фотажурналістыкі. Шэсць гадоў запар Беларусь прымае выставу з працамі пераможцаў, хоць конкурс існуе ўжо 62 гады. Як распавяла belsat.eu куратарка і менеджарка праекту з Нідэрландаў Санэ Схім ван дэр Люф, у гэтым годзе выставу пакажуць у 110 гарадах па ўсім свеце.
«Я ганаруся, што выставу мы можам паказаць у Беларусі. У 1955 годзе на першае спаборніцтва «World Press Photo» прыслалі 300 фотаздымкаў. А 60 гадоў пасля ў гэтым годзе мы атрымалі 80 тысяч здымкаў. Як вы бачыце, праект «трошкі» вырас», – адзначае куратарка выставы.
Кожная праца – візуальнае адлюстраванне нашага свету. Здымкі адбіраюцца прызнанымі фотакарэспандэнтамі з усяго свету. Склад журы мяняецца кожны год. Дзякуючы конкурсу ў фотажурналістаў па ўсім свеце ёсць магчымасць прыцягнуць увагу да пэўнай праблемы. За кожным здымкам хаваюцца ўнікальныя гісторыі людзей, якія часта шакуюць, кранаюць або натхняюць.
«Асобная частка сёлетняй выставы – гэта гісторыі пра жанчын, зробленыя жанчынамі. У фотажурналістыцы па ўсім свеце доўгі час дамінавалі мужчыны. Але, як мы бачым, усё больш жанчын становяцца фатографамі і ўсё болей іхных здымкаў мы бачым у СМІ. Да прыкладу, на выставе мы можам паглядзець жанчын з Ірану, якія, каб трапіць на футбольны матч, вымушаныя пераапранацца ў мужчынаў. Жанчына-фатограф, каб распавесці гэтую гісторыю, таксама мусіла так зрабіць. За што ёй мая вялікая павага», – распавядае Санэ Схім ван дэр Люф.
Апошнія чатыры гады ў Беларусі дапамагаў ладзіць выставу культурніцка-адукацыйны цэнтр ЦЭХ. У Горадні экспазіцыя арганізаваная ў партнёрстве з Цэнтрам гарадскога жыцця пры фінансавым падтрыманні амбасады Каралеўства Нідэрландаў у Варшаве.
ПВ, фота Васіля Малчанава / «Белсат»