Паводле арганізатараў, VIII UniCon Convention (UniCon) мусіць сабраць болей за 10 тысяч людзей.
Беларускі фестываль фантастыкі, фэнтэзі, коміксаў і камп’ютарных гульняў у фармаце ComicCon праводзіцца ўжо восьмы раз. Сёлета – на пляцоўцы ГЛЦ «Глобус Парк» пад Менскам у Шчомысліцы.
UniCon – гэта спалучэнне тэматычнай выставы, сцэнічнага шоў, майстар-класаў, творчых сустрэч і прэзентацый. Праводзіцца з 2012 года на добраахвотнай некамерцыйнай аснове.
Мэта фестывалю – стварыць умовы для камунікацыі людзей, якія захапляюцца навуковай фантастыкай, фэнтэзі, кампʼютарнымі гульнямі і коміксамі.
Паводле суарганізатаркі Вольгі Маладцовай, мінулы фестываль наведала больш за дзесяць тысячаў чалавек. Таму ў гэтым годзе чакаюць не меней.
Сёлетні фестываль налічвае дваццаць сем фандомных (тэматычных) сцэнаў і каля пяцідзесяці ўдзельнікаў.
Канвент адбываецца тры дні – з 6-га па 8-га верасня. Ёсць шанец паспець пазнаёміцца з гэтым фантастычным фестывалем. Тым больш, што ад метро «Малінаўка» арганізатары канвенту пусцілі бясплатны аўтобус.
Марыя Арцыбашава Belsat.eu
