Уначы 8 жніўня ў Камянецкім раёне Берасцейскай вобласці на заставе «Навасёлкі» памежнікі затрымалі грамадзяніна Аўстрыі, які заявіў, што хоча жыць у Беларусі. Пазней у яго выявілі нож, аптычны прыцэл ды іншыя рэчы, паходжанне якіх невядомае.
Пра здарэнне паведамляе прэс-служба Дзяржаўнага памежнага камітэту.
Памежнікі заўважылі мужчыну, які ішоў з Польшчы ў Беларусь. Сабака ўзяў след, неўзабаве яго затрымалі. Аўстрыец заявіў, што «больш не хоча заставацца ў сваёй краіне» і нібыта мае на мэце «пражыванне ў Беларусі».
Падчас дагляду ў яго знайшлі зменнае адзенне, тэлефон і планшэт, нож, кусачкі, нажоўку і аптычны прыцэл.
Навошта мужчыне спатрэбіўся менавіта прыцэл – не ўдакладняецца.
Пасля разбіральніцтва парушальніка выдалі польскаму боку.
КА belsat.eu