Кіраўнікі Беларусі ды Украіны 4 кастрычніка правялі ў Жытоміры перамовы ў вузкім складзе, перад іхнымі выступамі на пленарным паседжанні Форуму рэгіёнаў дзвюх краінаў.
Падчас размовы Аляксандр Лукашэнка паабяцаў, што Украіна ніколі не будзе мець праблемаў з тэрыторыі Беларусі.
«Мы заўсёды будзем самымі добрымі і надзейнымі вашымі прыхільнікамі, партнёрамі. І калі новая ўлада Украіны захоча мець з намі брацкія цесныя адносіны, за намі справа не стане», – запэўніў кіраўнік дзяржавы, паведамілі ў прэс-службе Лукашэнкі.
У сваю чаргу Уладзімір Зяленскі падкрэсліў ментальную блізкасць беларусаў і ўкраінцаў.
«Я ганаруся і ўпэўнены, што кожны ўкраінец ганарыцца, што ў нас такія добрыя суседзі і добрыя адносіны», – сказаў ён, паведамляе Офіс украінскага прэзідэнта.
Аляксандр Лукашэнка таксама адзначыў, што сёння яны з Уладзімірам Зяленскі сустракаюцца, каб яшчэ раз «зверыць гадзіннікі» і абмеркаваць парадак дня.
«Я ўпэўнены, што ўсё, пра што мы дамовімся, будзе выконвацца», – адзначыў кіраўнік Беларусі.
Акрамя таго, ён заявіў, што паміж жыхарамі дзвюх краінаў «няма ніякіх межаў», і нават мовы «блізкія і зразумелыя нашым людзям».
4 кастрычніка таксама прадугледжаныя перамовы дэлегацыяў Украіны і Беларусі пад старшынствам кіраўнікоў дзяржавы. Уладзімір Зяленскі і Аляксандр Лукашэнка выступяць на заключнай частцы Форуму рэгіёнаў.
Пасля гэтага адбудзецца цырымонія падпісання двухбаковых дакументаў.
Акрамя таго, плануецца, што кіраўнікі дзяржаваў агледзяць выставу буйнагабарытнай сельскагаспадарчай тэхнікі.
МГ belsat.eu
