Следчы камітэт распачаў крымінальную справу з прычыны выбухаў феерверкаў у Менску. Паводле інфармацыі СК, 3 ліпеня падчас святочнага салюту адбыліся чатыры выбухі феерверачных вырабаў.
У выніку былі разбураныя салютныя ўстаноўкі, ад аскепкаў пацярпелі не менш за 10 грамадзянаў. У тым ліку адна жанчына памерла. Акрамя таго, пашкоджаныя будынкі і збудаванні.
Крымінальная справа распачатая паводле ч. 2 арт. 463 КК (парушэнне правілаў абыходжання з рэчывамі і прадметамі, якія ўяўляюць павышаную небяспеку для навакольных).
Адпрацоўваюцца чатыры галоўныя версіі: няспраўнасць салютных установак, няспраўнасць феерверачных вырабаў, няправільна зараджаныя салютныя ўстаноўкі і няправільная эксплуатацыя салютных установак.
Зараз працягваецца праца на месцах здарэнняў, адбіраецца тэхнічная дакументацыя, звязаная з эксплуатацыяй салютных установак і феерверачных вырабаў. Дапытваюцца сведкі, у тым ліку вайскоўцы.
Прызначаныя экспертныя даследаванні.
МГ belsat.eu