Расея працягне дыялог з Беларуссю адносна паставак газу і нафты, не зважаючы на заявы Аляксандра Лукашэнкі. Пра гэта 17 лютага паведаміў прэс-сакратар кіраўніка РФ Дзмітрый Пяскоў. Пра гэта паведамляе ТАСС.
Пяскоў адзначыў, што дыялог паміж Беларуссю ды Расеяй будзе працягвацца, перадусім працягнуцца кантакты беларускіх кампаніяў непасрэдна з расейскімі пастаўшчыкамі нафты.
Адносна заявы Лукашэнкі, што калі РФ у лютым не паставіць нафту ў патрэбных аб’ёмах, Менск пачне адбор з транзітнай трубы, прэс-сакратар адзначыў, што «часам, сапраўды, эмоцыі бяруць верх». Аднак, паводле яго, у Сочы кіраўнікі дзвюх краін «дасягнулі пэўнага разумення», з якога і трэба зыходзіць.
«Кіраўнікі дзяржаваў вырашылі, што на ўзроўні кабінетаў, чальцоў кабінетаў, якія курыруюць пытанні двухбаковай інтэграцыі, будуць як раз займацца далей прапрацоўкай тэмы паставак энергарэсурсаў», – сказаў Пяскоў.
Пры гэтым ён пакінуў без каментароў выказванні Лукашэнкі пра нібыта наяўнай у Масквы мэты інкарпараваць Беларусь.
Лукашэнка патрабуе 24 млн т нафты
У сваю чаргу сам кіраўнік Беларусі, зацвярджаючы 17 лютага рашэнне на ахову дзяржаўнай мяжу, заявіў пра «шквал крытыкі ў наш адрас з боку Расеі, што мы нібыта пагражаем ці то спыніць пастаўкі нафты на Захад, ці то выліліся пагрозамі, што будзем браць нафту з транзітнага нафтаправода для забеспячэння нашых НПЗ».
Лукашэнка падкрэсліў: паміж Беларуссю і Расеяй афіцыйна замацаваная дамоўленасць на пастаўку 24 млн т нафты.
«Вось і ўсё», – сказаў ён, паведамілі ў Адміністрацыі беларускага кіраўніка.
14 лютага кіраўнік краіны выказаўся адносна апошніх беларуска-расейскіх перамоваў.
«Я нікога не шантажаваў, сказаў: калі з Расеі не будзе пастаўлена нафты ў патрэбных абʼёмах (у студзені яны паставілі ўсяго 500 тыс. т – 1,5 млн т недапаставіў), мы пачнем адбор з транзітнай трубы», – сказаў ён.
Таксама, паводле яго, у кіраўніцтве Расеі намякаюць на далучэнне Беларусі ў абмен на адзіныя кошты на энерганосьбіты. Але, заявіў ён, ні беларускі, ні расейскі народы ніколі не захочуць пайсці па гэтым шляху.
МГ belsat.eu
