2 лютага пачынае дзеяць новы Візавы кодэкс Еўразвязу. З гэтага дня візы ў ЕЗ для грамадзянаў Беларусі падаражэюць да 80 еўраў. Праўда, з чэрвеня ўступіць у сілу дамова аб спрашчэнні візавага рэжыму, якая прадугледжвае, сярод іншага, зніжэнне кошту шэнгенскіх візаў для беларусаў да 35 еўраў. Але некалькі месяцаў для турыстаў, а таксама і турыстычных фірмаў, сітуацыя будзе не вельмі прыемная. Ужо цяпер некаторыя кампаніі канстатуюць спад колькасці зваротаў.
У Берасці турфірмы фактычна прыпынілі працу
Некаторыя турыстычныя фірмы ў Берасці не ведаюць, як далей будзе развівацца сітуацыя з візамі і фактычна нічым не могуць дапамагчы сваім кліентам. У турыстычнай кампаніі «Крыс» распавялі «Белсату», што ўжо цяпер істотна знізілася колькасць зваротаў:
«Мы пакуль не ведаем, як будзе развівацца сітуацыя. Раней былі палёгкі. А цяпер нават для 12-гадовых дзяцей кошты візы будзе такі ж, як і для дарослых. Таму нават не можам сказаць, з якім настроем нам працаваць надалей. Калі восенню летась нічога не маглі з старымі коштамі зрабіць, то цяпер наагул складаная сітуацыя».
Асноўная праблема, як адзначаюць у кампаніі, адсутнасць магчымасці зарэгістравацца на атрыманне візы на сайце Польскага консульства.
«Мы цяпер не можам дапамагчы людзям, бо нават зарэгістравацца не можам. Калі раней у нас быў асобны доступ да рэгістрацыі, то цяпер, на жаль, не можам. А з боку пасольства ніякіх каментароў няма. Так выглядае, што ім усё роўна», – дадалі ў туркампаніі.
У турыстычнай фірме кажуць, што цяпер працуюць са стратамі, паколькі няма ніякіх прыбыткаў.
«У нас цяпер аўтобусы проста прастойваюць. Раней таксама студзень-люты былі стратнымі. Але сёлета нават і пасля гэтага перыяду ў нас няма асаблівых ілюзіяў наконт паляпшэння сітуацыі. Нібыта з чэрвеня візы будуць больш таннымі. Але якія патрабаванні – мы пакуль не ведаем. Як на сёння 100 долараў з фізічнай асобы за візу – гэта вельмі шмат. Тым больш, што невядома, якая віза будзе, добра, калі на год ці два. А калі на месяц – то вельмі непрыемна», – дадалі ў кампаніі.
Гарадзенцы спяшаюцца зрабіць візы па старых коштах
А вось у Горадні колькасць ахвочых зрабіць візы цягам студзеня істотна вырасла, распавялі «Белсату» у кампаніі kolybri.by.
«Калі з’явілася інфармацыя пра павелічэнне коштаў на візы, то ў нас павялічылася колькасць зваротаў. Людзі намагаюцца паспець да лютага, пакуль старыя кошты на візы», – распавёў «Белсату» кіраўнік візавага агенцтва kolybri.by Віктар Дучак.
Кіраўнік візавага цэнтру выказвае меркаванне, што з 2-га лютага ў сітуацыі з новымі правіламі нічога не зменіцца, акрамя памеру консульскага збору. Пры гэтым замежныя консульствы дадатковай інфармацыі пра новы Візавы кодэкс Еўразвязу не агучваюць.
«Вядома, мы чакаем, што колькасць зваротаў зменшыцца. Людзі проста падумаюць, ці патрэбна ім віза. Многія будуць чакаць, пакуль консульскі збор зменшыцца, бо некаторыя падаюць дакументы і на дзяцей. Калі нехта робіць візу асобна, для сябе, мае добры прыбытак, то рост коштаў на 20 еўраў асаблівай ролі не мае. Але ў цэлым мы чакаем, што колькасць зваротаў зменшыцца на 10 – 20 %», – распавёў Віктар Дучак.
Чаму падпісанне дамовы так зацягнулася?
Падпісанне дамовы аб рэадмісіі і спрашчэнні візавага рэжыму паміж ЕЗ і Беларуссю зацягнулася праз шэраг момантаў. Меркавалася, што дакументы падпішуць у Менску яшчэ ў кастрычніку летась падчас сустрэчы ў межах «Усходняга партнёрства». Але візіт кіраўніцы еўрапейскай дыпламатыі Фэдэрыкі Магерыні ў Менск раптоўна перанеслі. У рэшце дамову 8 студзеня 2020 года падпісалі міністр замежных справаў Уладзімір Макей, з боку ЕЗ – намеснік прэм’ер-міністра – міністр унутраных спраў Рэспублікі Харватыя Давор Бажыновіч (ад імя харвацкага старшынства ў Еўрапейскім Звязе) і Еўрапейскі камісар па ўнутраных справах Ільва Ёхансан.
Чакаецца, што ў чэрвені 2020 года шэнгенскія візы для беларусаў патаннеюць да 35 еўраў, максімальны час разгляду справы будзе складаць 10 дзён, бясплатныя візы будуць атрымліваць дзеці да 12 гадоў, а таксама тыя, хто едзе з адукацыйнымі або некамерцыйнымі мэтамі, не маючы 25 гадоў.
Спрашчэнне візавага рэжыму паспрыяе развіццю турыстычнай галіны ў Беларусі
«Пакуль гэта ўсё сырое і няма пра што казаць, няхай пройдзе час. Таму што заявы палітыкаў не заўсёды супадаюць з рэчаіснасцю. Бо пакуль запрацуе рэальны механізм, пакуль практыкі далучацца, тады можна размаўляць. Але ў любым выпадку намеры добрыя. Але да чэрвеня яшчэ час, як раз распачнецца сезон і фірмы ўвойдуць у рэжым», – распавёў «Белсату» дырэктар Саюзу турыстычных арганізацыяў Валянцін Цэхмейстэр.
- з 2 лютага пачынае дзейнічаць новым Візавы кодэкс Еўразвязу, у выніку чаго на некаторы час візы ў ЕЗ для грамадзянаў Беларусі могуць падаражэць да € 80. Пасля чаго віза патаннее да € 35.
- У афіцыйным прэс-рэлізе Еўракамісіі гаворыцца, што дамова ўтупіць у сілу ў чэрвені 2020.
СК belsat.eu
