Кіраўнік Беларусі 12 лістапада падчас прэс-канферэнцыі ў Вене адказаў журналістам пра ўжыванне ў краіне смяротнага пакарання. Паведамляе карэспандэнт «Белсату».
Аляксандр Лукашэнка падкрэсліў, што пытанне выканання смяротных прысудаў было вынесенае на рэферэндум 1995 года.
«Рэферэндум увёў смяротнае пакаранне ў Беларусі. Толькі рэферэндум можа яго адмяніць», – сказаў кіраўнік Беларусі.
Можам патрываць без Рады Еўропы
Паводле яго, з таго часу меркаванне беларусаў адносна смяротнага пакарання не змянілася. Але, адзначыў Лукашэнка, улады краіны супольна з еўрапейскімі інстытутамі працуюць над гэтым.
Ён таксама адзначыў, што смяротнае пакаранне ўжываецца таксама ў іншых краінах, напрыклад, у ЗША і Кітаі.
Пракаментаваў Лукашэнка і той факт, што Рада Еўропы адмаўляецца прымаць у свой склад Беларусь, якая застаецца адзінай еўрапейскай краінай, дзе ўжываецца смяротнае пакаранне.
«Што датычыць Рады Еўропы і нашага сяброўства: прыміце – дзякуй, не – патрываем», – заявіў ён.
Праекты на $ 1 млрд
Кіраўнік Беларусі таксама паведаміў, што Беларусь і Аўстрыя дамовіліся працягваць сумесную працу ў міжнародных арганізацыях. Была абмеркаваная ахова наваколля, процідзеяння зменам клімату.
Лукашэнка адзначыў падтрыманне Аўстрыяй намаганняў афіцыйнага Менску развіваць стасункі з Еўразвязам. Паводле яго, дзве краіны аб’ядноўвае імкненне да развіцця «Усходняга партнёрства» як цэласнага, гнуткага і эфектыўнага інструмента супрацы ў рэгіёне.
Ён заявіў, што з удзелам аўстрыйскіх кампаніяў прапрацоўваюцца новыя праекты на агульную суму звыш за $ 1 млрд.
МГ belsat.eu
