Апазіцыйныя тэлеграм-каналы паведамляюць пра новую хвалю затрыманняў актывістаў.
Як паведамляе тэлеграм-канал «Шэры кот», у Полацку затрыманы блогер Алесь Круткін. Удома ў яго праходзіць вобшук з удзелам крымінальнага вышуку.
У Наваполацку затрыманы Андрэй Зуеў, які з’яўляецца валанцёрам ініцыятыўнай групы Святланы Ціханоўскай. Пра гэта піша тэлеграм-канал «Полоцк. Новополоцк. Страна для жизни».
Тэлеграм-канал «Маладога фронту» паведаміў, што затрыманы першы сакратар МФ Максім Урбановіч. Яго затрымалі раніцай пры выхадзе з уласнай кватэры.
З вечара 2 чэрвеня людзі ў цывільным дзяжураць пад домам актывіста грамадзянскай кампаніі «Еўрапейская Беларусь» Яўгена Афнагеля ў Менску, паведамілі ў прэс-службе кампаніі.
Праваабарончы цэнтр «Вясна» паведамляе, што раніцай 3 чэрвеня быў затрыманы Валянцін Троцкі. Таксама ў міліцыю за ўдзел у перадвыбарным пікеце 31 траўня выклікаюць Валерыя Рабцава і Сяргея Мацкойця.
У Наваполацку затрыманы сябра ініцыятыўнай групы Святланы Ціханоўскай Артур Сінега.
Тэлеграм-канал «Выборы. Беларусь» дадае, што ціхары дзяжураць пад домам сустаршыні Беларускай хрысціянскай дэмакратыі Паўла Севярынца.
МГ belsat.eu