Жыхары аднаго з інтэрнатаў Магілёва даслалі MSPRING.ONLINE заявы, у якіх яны адклікаюць свае подпісы, пастаўленыя за вылучэнне дзейнага кіраўніка краіны кандыдатам на прэзідэнта.
Аўтары зваротаў – Гарбузава А.М. і Нікіцёнак А.У. – заяўляюць, што вырашылі адклікаць свае подпісы за Аляксандра Лукашэнку.
Паводле іх, у працоўны час 26 траўня да іх у пакоі заявіліся працаўнікі інтэрнату і запатрабавалі падпісацца за вылучэнне дзейнага кіраўніка краіны.
Паводле Гарбузовай, яна паставіла свой подпіс, бо баялася, што яе з трыма дзецьмі могуць выселіць з жытла раней, чым яна паспее дарабіць рамонт у сваёй новай кватэры.
Цяпер жанчына шкадуе пра свой учынак і адклікае подпіс за Лукашэнку, бо «ўся сям’я хоча жыць у цывілізаванай і нармальнай краіне, у якой улада не мае права прыгнятаць свой народ».
«Я раскайваюся ў сваім учынку і прашу адклікаць свой подпіс за дадзенага кандыдата», – растлумачыў у сваёй заяве Нікіцёнак.
Свае заявы магілёўцы накіравалі 2 чэрвеня ў раённую выбарчую камісію.
МГ belsat.eu