«Унутраная справа Расеі». Пуцін абтэлефаноўвае кіраўнікоў СНД, але яго не падтрымоўваюць
Прэзідэнт Расеі Уладзімір Пуцін раніцай 24 чэрвеня правёў тэлефонныя размовы не толькі з Аляксандрам Лукашэнкам, але і з прэзідэнтам Узбекістану Шаўкатам Мірзіёевым і прэзідэнтам Казахстану Касым-Жамартам Такаевым. Пра гэта паведаміў ТАСС прэс-сакратар Пуціна Дзмітрый Пяскоў.
Прэзідэнт Казахстану Касым-Жамарт Такаеў адносна мяцяжу Яўгенія Прыгожына адзначыў, што «падзеі, якія адбываюцца, – гэта ўнутраная справа Расеі».
«Канстытуцыйны парадак і вяршэнства закону – абавязковая ўмова падтрымання правапарадку ў краіне. Гэта аснова бяспекі грамадства і яго паспяховага развіцця», – цытуе казахскага прэзідэнта ягоная прэс-служба.
Там таксама адзначылі, што Уладзімір Пуцін «падзякаваў за праяўленае разуменне Казахстанам сітуацыі ў Расейскай Федэрацыі».
Падрабязнасцяў размовы з кіраўніком Узбекістану няма. Але пакуль не вядома, каб хтосьці з кіраўнікоў СНД, ЕАЭС ці АДКБ падтрымаў Пуціна.
Раніцай 24 чэрвеня звязаны з прэс-службай Аляксандра Лукашэнкі тэлеграм-канал «Пул Первого» паведаміў пра тэлефанаванне расейскага прэзідэнта: «Уладзімір Пуцін праінфармаваў беларускага калегу аб сітуацыі ў Расеі».
Якуб Хруст belsat.eu
