З 3 ліпеня Літва ўзмацняе жорсткасць правілаў транзіту грузаў праз Беларусь і Расею для прадухілення абыходу санкцый, паведамляе літоўская мытня.
Цяпер перавозчыкі будуць абавязаны падаць дэкларацыю вытворцы, усяго абмежаванні закрануць 57 груп тавараў. Такія змены былі прадугледжаны літоўскай мытняй для больш эфектыўнага прадухілення магчымага абыходу міжнародных санкцый.
У дакуменце вытворца тавараў, якія экспартуюцца або рээкспартуюцца, павінен указаць, што ён ведае прадаўца сваіх тавараў і іх канечнага пакупніка ў трэцяй краіне. Таксама ён павінен будзе ўказаць, што ўпэўнены ў тым, што тавары дойдуць да пакупніка ў трэць краіне і не будуць перапрадавацца, перапрацоўвацца, захоўвацца або перавальвацца на іншы від транспарту ў Беларусі або Расеі.
Без дэкларацыі вытворцы тавар не выпусціць за межы Еўразвязу.
Раней у Літве заяўлялі, што пад абмежаванні патрапяць тавары падвойнага прызначэння, якія патэнцыйна могуць выкарыстоўвацца РФ для агрэсіі супраць Украіны.
Алена Рувіна belsat.eu