«BELPOL»: летась у Беларусі завялі 85 тысячаў крымінальных справаў, чвэрць – за пакражу
Арганізацыя «BELPOL» раскрыла справаздачу сілавікоў аб крымінальных справах, што былі заведзеныя летась. Амаль усе яны былі ўзбуджаныя Следчым камітэтам. Самыя частыя злачынствы ў Беларусі – пакража і крадзеж маёмасці шляхам мадыфікацыі камп’ютарнай інфармацыі.
96% з 85 тысячаў крымінальных справаў, узбуджаных летась, ініцыяваў Следчы камітэт. МУС і КДБ завялі ўсяго 188 і 242 справы адпаведна, пракуратура адкрыла 2200 справаў, гаворыцца ў статыстыцы сілавікоў, якую абнародавала арганізацыя «BELPOL».
Самыя частыя злачынствы ў Беларусі:
- пакража (24,3% усіх крымінальных справаў);
- крадзеж маёмасці шляхам мадыфікацыі камп’ютарнай інфармацыі (14,3%);
- махлярства (13,7%);
- ухіленне бацькоў ад утрымання дзяцей або ад пакрыцця выдаткаў, затрачаных дзяржаваю на ўтрыманне дзяцей (7,5%);
- незаконны абарот наркатычных сродкаў (4,4%);
- хуліганства (3,98%).
У 2022 годзе зарэгістраваных злачынстваў было больш: 88,6 тысячы. Летась зафіксавана 223 забойствы (у 2022 годзе было 255), 110 згвалтаванняў (было 119), 3798 злачынстваў, звязаных з наркотыкамі (было 4553).
Больш за палову злачынстваў учыняюць асобы, якія нідзе не працуюць і не навучаюцца. У траціне выпадкаў фігурантамі сталіся рэцыдывісты, а таксама людзі ў нападпітку.
У «BELPOL» адзначылі, што апублічылі толькі першую частку справаздачы, лічбы, якія тычацца палітычнага пераследу, абяцаюць апублікаваць пазней.
Сцяпан Кубік belsat.eu
