У Дзень народнага адзінства ўлады ліквідавалі Таварыства беларускай школы. Пра гэта паведаміла намесніца старшыні Тамара Мацкевіч.
Таварыства беларускай школы праіснавала ў Беларусі 100 год з перапынкамі ў савецкія часы.
Таварыства беларускай школы – гэта добраахвотная грамадская культурна-асветная арганізацыя, якая аб’ядноўвае грамадзян з мэтай стварэння сучаснай сістэмы нацыянальнай асветы і адукацыі, а таксама спрыяе развіццю адукацыі на беларускай мове.
Датай стварэння Таварыства лічыцца 22 лютага 1921 года, калі на адным з пасяджэнняў Цэнтральнай беларускай школьнай рады ў Вільні была прынята пастанова стварыць спецыяльнае Таварыства, якому б можна было перадасць свае паўнамоцтвы і маёмасць.
Праз некаторы час быў зацверджаны статут гэтай арганізацыі. Галоўны напрамак дзейнасці арганізацыі вызначаўся як «развiццё беларускiх школ і беларускай асветы наогул». Згодна з палажэннем статута, Таварыства мела права адкрываць i ўтрымліваць народныя школы, праводзіць курсы, аказваць вучэбна-метадычную i грашовую дапамогу.
Першы раз Таварыства беларускай школы было забаронена польскімі ўладамі 2 снежня 1936 года. Адноўлена ў 22 сакавіка 1996 як Рэспубліканскае грамадскае аб’яднанне «Таварыства беларускай школы», якое было зарэгістравана Міністэрствам юстыцыі.
Толькі ў 2020-21 гадах сябры Таварыства беларускай школы напісалі 7 навучальна-метадычных дапаможнікаў для настаўнікаў.
АД, belsat.eu