Беларусь гатова перагарнуць старонку і абмяркоўваць з Польшчай і краінамі Балтыі вострыя пытанні. Аб гэтым заявіў кіраўнік Камітэту дзяржбяспекі Іван Церцель, паведамляе БелТА.
Церцель паскардзіўся, што Польшча не адказала на прапанову беларускіх уладаў аб устанаўленні ўнутрысуседскіх адносін.
«Кіраўнік дзяржавы неаднаразова выказваўся па пытанні стасункаў з Польшчай і іншымі нашымі суседзямі. Беларусь – міралюбівая дзяржава, якая прытрымліваецца прынцыпаў неўмяшання ва ўнутраныя справы, добрасуседства, развіцця культурных, эканамічных, палітычных сувязей. Розныя часы бывалі, але зараз адносіны з Польшчай знаходзяцца на беспрэцэдэнтна нізкай кропцы. Іх практычна няма. Але трэба сказаць, што гэта не з-за нашай віны. Мы не ўводзілі санкцыі супраць Польшчы, не закрывалі пункты пропуску. Наадварот, кіраўнік дзяржавы даваў даручэнні ўраду аб устанаўленні добрасуседскіх адносін, а таксама абмеркаванні праблемных пытанняў без папярэдніх умоў. На жаль, рэакцыі ў адказ не было», – заявіў Церцель.
Кіраўнік КДБ не змог сказаць, як будуць развівацца адносіны з новым урадам Польшчы, і заявіў аб «паўпанічных» настроях сярод беларусаў, якія з’ехалі. Ён лічыць, што яны баяцца добрых стасункаў паміж Польшчай і беларускімі ўладамі. Паводле слоў Церцеля, Беларусь гатова да дыялогу ў любых фарматах і гатова перагарнуць старонку.
«Мы гатовы абмяркоўваць самыя вострыя пытанні. Гэта воля кіраўніка дзяржавы. Гэта датычыцца, дарэчы, і Прыбалтыкі. Я лічу, што шанец перагарнуць старонку і пачаць з чыстага ліста ёсць. Мы да гэтага гатовыя», – заявіў старшыня КДБ.
У чэрвені 2023 года Аляксандр Лукашэнка даручыў ураду распрацаваць план добрасуседства і міру з суседнімі краінамі. У лістападзе, пасля парламенцкіх выбараў у Польшчы, беларускае МЗС заявіла, што чакае фарміравання новага ўрада і гатовае да дыялогу. Новы ўрад на чале з Дональдам Тускам быў прыведзены да прысягі 13 снежня.
СП, belsat.eu
