У Беларусі за апошнія 5 гадоў больш як 3,5 тысячы дзяцей сталіся ахвярамі сексуальных злачынстваў (з іх у 2022 годзе – 922). Пра гэта заявіў прадстаўнік Генпракуратуры Раман Сідарэнка.
Колькасць няпоўнагадовых, пацярпелых ад згвалтаванняў, павялічылася на 33 % (з 33 да 44 асобаў), лік пацярпелых ад распусных дзеянняў вырас утрая (з 91 да 328 асобаў), лік пацярпелых ад вырабу і распаўсюду парнаграфічных матэрыялаў з выявай непаўналетніх – у 6 разоў (з 11 да 70 асобаў).
За сем месяцаў 2023 года праваахоўныя органы (у параўнанні з аналагічным перыядам 2022 года) выявілі на 56 % больш пацярпелых дзяцей.
Паводле Сідарэнкі, у кожным трэцім выпадку злачынец раней не быў знаёмы са сваёй ахвярай. Больш як у палове выпадкаў злачынец быў нейкім чынам звязаны з ахвярай: гэта сябры сямʼі, суседзі ці іншыя знаёмыя.
«Колькасць злачынстваў супраць палавой недатыкальнасці або палавой свабоды, папярэдняе расследаванне крымінальных справаў паводле якіх завершанае, павялічылася на 38 %», – падкрэсліў прадстаўнік Генпракуратуры.
Сідарэнка пры гэтым прызнаў, што афіцыйная статыстыка не можа цалкам адлюстроўваць фактычнай сітуацыі, бо дзеці рэдка звяртаюцца па дапамогу ў выпадку, калі становяцца ахвярамі такіх злачынстваў.
Глеб Нержын belsat.eu
