Цяперашні прэзідэнт Узбекістану Шаўкат Мірзіёеў перамог на датэрміновых выбарах з вынікам 87,05 % галасоў паводле мясцовага Цэнтрвыбаркаму.
9 ліпеня ва Узбекістане праходзілі датэрміновыя прэзідэнцкія выбары, прызначаныя пасля абнаўлення Канстытуцыі, паводле якой тэрмін прэзідэнцкіх паўнамоцтваў будзе складаць 7 гадоў.
Акрамя таго, папраўкі дазволяць Шаўкату Мірзіёеву, які ўжо адбыў два прэзідэнцкія тэрміны з 2016 года, абнуліць папярэднія тэрміны і кіраваць краінай яшчэ 14 гадоў – да 2037 года.
Паводле звестак Цэнтрвыбаркаму Узбекістану, яўка на выбарах склала 79,8 %. За Мірзіёева, згодна з афіцыйнай інфармацыяй, прагаласавалі 87,05 % выбарцаў. Астатнія кандыдаты набралі 3–4 % галасоў:
- Рабахон Махмудаў, кандыдат ад Сацыял-дэмакратычнай партыі «Адолат» – 4,43 %
- Улугбек Інаятаў, кандыдат ад Народна-дэмакратычнай партыі НДПУ – 4,02 %
- Абдушукур Хамзаеў, кандыдат ад Экалагічнай партыі Узбекістану – 3,74 %.
Шаўкат Мірзіёеў прыйшоў на прэзідэнцкі пост пасля смерці былога кіраўніка краіны Іслама Карымава. Спачатку ён быў выканаўцам абавязкаў, а потым перамог у прэзідэнцкіх выбарах у снежні 2016 года, набраўшы 87,73 % галасоў. У кастрычніку 2021 года Мірзіёева пераабралі на другі тэрмін з вынікам 80,12 % галасоў.
Марыя Міхалевіч belsat.eu
