АБСЕ прызнала «мяккую анексію» Беларусі Расеяй, а ПВК Вагнэра – тэрарыстычнай арганізацыяй
У канадскім Ванкувэры адбылася 30-ая Парламенцкая асамблея Арганізацыі бяспекі і супрацы ў Еўропе. Парламентарыі прынялі шэраг дакументаў, сярод якіх і рэзалюцыя ў справе Беларусі.
Падчас паседжання Парламенцкай асамблеі АБСЕ ў Ванкувэры парламентарыі рашуча асудзілі ваенную агрэсію Расеі супраць Украіны. Беларусь у дэкларацыі АБСЕ называецца суагрэсарам, але адзначаецца, што Расея зладзіла таксама і «мяккую анексію» Беларусі.
ПА АБСЕ патрабуе ад рэжыму Беларусі спыніць падтрыманне расейскай агрэсіі, спыніць рэпрэсіі ўнутры краіны, вызваліць усіх палітвязняў, адмяніць смяротную кару.
Разам з гэтым АБСЕ прызнала ПВК Вагнэра тэрарыстычнай арганізацыяй, а Расею – яе спонсарам.
«Дзеянні ПВК Вагнэра ад імя ўраду Расейскай Федэрацыі могуць быць правамерна класіфікаваныя як тэрарыстычныя паводле іх прыроды і намеру, і такім чынам, прызнанне ПВК Вагнэра тэрарыстычнай арганізацыяй нацыянальнымі ўладамі ёсць апраўданым», – гаворыцца ў дэкларацыі.
ПА АБСЕ рашуча асуджае ўлады Беларусі за падтрыманне і дазвол будаўніцтва вайсковай базы для ПВК Вагнэра на тэрыторыі Беларусі, што «стварае пагрозу для ўсіх краінаў Балтыі».
Алена Аляксандрава belsat.eu
