Лідар зліквідаванай уладамі Беларускай сацыял-дэмакратычнай Грамады і кандыдат на выбарах-2020 Сяргей Чэрачэнь расказаў на сваім Telegram-канале пра хобі – паляванне.
Сяргей Чэрачэнь пахваліў паслугі для паляўнічых у Беларусі: добрая арганізацыя, «добры звер» і някепскі сэрвіс. Маўляў, «часта партнёры прыязджаюць у Беларусь паляваць». Пры актыўным размнажэнні драпежнікаў выдаюцца ліцэнзіі на адстрэл, кантралюецца папуляцыя дзікоў (якіх у Беларусі практычна вынішчылі), падтрымліваецца баланс у прыродзе. Паляўнічыя-турысты пакідаюць у Беларусі ад тысячы долараў, на тыдзень паляўнічыя ўгоддзі зарабляюць 10–20 тысяч долараў.
«Расейцы часта ставяць нас у прыклад у адносінах да жывой прыроды. У Беларусі няма браканьерства, і грошы, выплачаныя за трафей, ідуць на развіццё экасістэмы ды павелічэнне папуляцыі жывёлінаў, а не на ўзбагачэнне чорнага рынку адстрэлу жывёлы», – расказаў Чэрачэнь.
Але апошні раз Чэрачэнь ездзіў паляваць у расейскую Волагду. Гэта ён патлумачыў тым, што там «мядзведзь – пад кожным кустом», папуляцыя перавышае 10 тысяч жывёлінаў. Іншых тлумачэнняў паездкі на паляванне ў Расею ён не даў.
Фота Чэрачня з палявання з забітымі жывёлінамі:
Чэрачэнь таксама расказаў, што паляванне для яго – «спакойнае яднанне з прыродаю», як і рыбацтва. Забойства жывёлы – «магчымасць абстрагавацца ад гарадской мітусні», «правесці некалькі дзён без тэлефона і са сваймі сябрамі», «пабыць сам-насам з сабою, без лішняга шуму і мітусні».
«Асабіста я думаю, што паляванне дапамагае выпрацоўваць характар, – адзначыў Чэрачэнь. – На паляванні няма манерных, ёсць мэта і секунды для прыняцця рашэння. Жонка нармальна ставіцца да маіх захапленняў. Гэта мужчынскія моманты, і яна гэта разумее».
Сяргей Чэрачэнь узначаліў Беларускую сацыял-дэмакратычную Грамаду ў 2018 годзе: выхадзец з Камуністычнай партыі замяніў на пасадзе Станіслава Шушкевіча. У 2020-м быў адным з кандыдатаў на прэзідэнта – казаў, што на выбары ідзе, «каб набрацца досведу» і падрыхтавацца да прэзідэнцкай кампаніі-2025. Пасля выбараў не трапіў пад рэпрэсіі, хоць затрымлівалі кіраўніка ягонага перадвыбарчага штабу. У 2023 годзе партыю Чэрачня зліквідавалі. На наступных прэзідэнцкіх выбарах, калі яны адбудуцца, Чэрачэнь збіраецца выстаўляць сваю кандыдатуру.
Алесь Наваборскі belsat.eu