Старшыня партыі «Беларуская сацыял-дэмакратычная Грамада» Сяргей Чэрачэнь абвесціў пра планы вылучыць сваю кандыдатуру на прэзідэнцкіх выбарах, што маюць адбыцца ў 2025 годзе. Палітычны аглядальнік Аляксандр Класкоўскі не выключае, што палітыка сапраўды зарэгіструюць, і гэтым скарыстаюцца дэмакратычныя цэнтры за мяжою.
Кіраўнік партыі «Беларуская сацыял-дэмакратычная Грамада», бізнесовец і ўдзельнік прэзідэнцкіх выбараў 2020 года Сяргей Чэрачэнь заявіў, што вылучыць сваю кандыдатуру і ў наступную кампанію, якая мае адбыцца ў 2025-м.
«Асабіста ў мяне захоўваюцца жаданне і сілы вылучаць сваю кандыдатуру на будучых прэзідэнцкіх выбарах. Я і мая каманда шмат часу і сілаў выдаткавалі на тое, каб рэпрэзентаваць інтарэсы нашых выбарнікаў на палітычным полі», – сказаў палітык у інтэрв’ю «Народнай волі».
Палітык адзначыў, што «гуляе паводле пэўных правілаў, бо ў нашай краіне маюцца чырвоныя лініі, асабліва пасла 2020 года, якія пераходзіць нельга»:
«Усе мы выдатна разумеем: калі б я выказваў погляд, якіх прытрымліваюцца нашыя калегі, якія з’ехалі на Захад, то ўжо даўно сядзеў бы ў турме. Або давялося б зʼязджаць за мяжу ў багажніку машыны. Але гэта не гаворыць пра тое, што я пры ўсёй маёй асцярожнасці не рэпрэзентую інтарэсаў сваіх людзей».
Чэрачэнь пры гэтым прызнаў, што браць удзел цяпер у палітычным жыцці – справа безнадзейная:
«Ясна, што на гэты момант ніякіх перспектываў няма, але я кажу пра доўгатэрміновую перспектыву. Спадзяюся, што перамены ў краіне некалі будуць. Гэта пытанне часу. І да гэтага трэба рыхтавацца. Калі апусціць рукі цяпер, то хто будзе весці за руку новых хлопцаў, у якіх шмат ініцыятываў? Калі ўсе зʼедуць з краіны, то дакладна нічога добрага не будзе».
Палітычны аглядальнік праекту «Позірк» Аляксандр Класкоўскі ў размове з «Белсатам» адзначыў: рэалізацыя планаў Чэрачня залежыць не ад яго, а ад уладаў.
«Не выключана, што ўлады ўсё-ткі захочуць трошкі дадаць фарбаў у такую шэрую, брутальную выбарчую кампанію, з дазволу сказаць, бо выбарамі гэта можна толькі ў двукоссі называць, і паспрабуюць зладзіць нейкую гульню, імітацыю: маўляў, у нас людзі з рознымі поглядамі», – сказаў Класкоўскі.
З іншага боку, нават стрыманую апазіцыйнасць Чэрачня могуць палічыць празмернаю:
«І да 2020 года ў Чэрачня была рэпутацыя вельмі памяркоўнага палітыка, у цяперашніх умовах наўрад ці ён збіраецца радыкалізаваць свае лозунгі, аднак улады, імаверна, у сённяшняй сітуацыі нават такую ўмераную апазіцыйнасць могуць палічыць празмернаю, непатрэбнаю. Цяпер усё ідзе ў кірунку таталітарызацыі палітычнага жыцця ў Беларусі, і зачышчаецца любая альтэрнатыва, любое, нават кволае нейкае, іншадумства».
Суразмоўца «Белсату» заўважае: у бюлетэнях не можа быць адзінюткі Лукашэнка, таму нейкіх «канкурэнтаў» трэба знайсці.
«Натуральна, ці Лукашэнку, ці, калі ўявіць сабе, Качанавай спатрэбяцца нейкія спарынг-партнёры. На гэтую ролю будуць кандыдатаў падшукваць. Нейкае поле для гульні патэнцыйна ёсць. Аднак таму ж Чэрачню або іншаму кандыдату, які згодзіцца гуляць паводле правілаў уладаў, давядзецца вельмі прыглушаць танальнасць сваіх выказванняў, бо за любую крытыку ўладаў можна атрымаць ярлык экстрэміста і крымінальны артыкул», – канстатаваў Класкоўскі.
Аналітык назваў вялікаю праблемаю для дэмакратычных сілаў распрацоўванне стратэгіі для выбараў, што маюць адбыцца налета і ў 2025 годзе. Нешта прапаноўваць трэба, хоць і галасоў не лічаць, і амаль няма ўплыву на сітуацыю ўнутры Беларусі. Адзін з варыянтаў – тактыка «Разумнага галасавання», што ўжывалася на выбарах у Расеі на прапанову структураў апазіцыянера Аляксея Навальнага.
«Прыхільнікі Навальнага ў нейкіх акругах заклікалі галасаваць за камуністаў, а не за «Единую Россию», але ж і КПРФ таксама скача пад дудку расейскіх уладаў, многія камуністы падтрымоўваюць імперскую агрэсіўную палітыку Крамля, таму тут, ведаеце, хрэн за рэдзьку не саладзейшы. Дапускаю, што такая тактыка можа быць на выбарах у Беларусі, калі дэмакратычныя сілы будуць заклікаць галасаваць хаця б за ўмоўна трошкі лепшых кандыдатаў, аднак не ўпэўнены, што гэта дасць нейкі вялікі плён», – кажа Класкоўскі.
Сам Чэрачэнь, якога могуць «прызначыць» адзіным годным кандыдатам, будзе не ў захапленні ад гэтай ролі, мяркуе аналітык:
«Гэта ж кляймо. Скажуць: ага, калі цябе «збеглая пятая калона» падтрымоўвае, значыцца, ты таксама вораг. Тут вялікае пытанне, як на гэта можа адрэагаваць сам такі кандыдат. Ён можа палічыць, што гэта капітальная падстава, і пачаць крытычна выказвацца на адрас «збеглых».
Пры гэтым на найбліжэйшых выбарах 2024 года мэты цяперашніх уладаў відавочныя: «цалкам лаяльны парламент, калі яго можна называць парламентам, цалкам лаяльны Усебеларускі народны сход».
«Натуральна, або не прапусцяць кандыдатаў, якія будуць здавацца нядобранадзейнымі, або будуць нейкія закулісныя дамовы: вы цалкам гуляеце ў нашую гульню і толькі імітуеце нейкія нюансы ў сваіх пазіцыях», – рэзюмаваў Аляксандр Класкоўскі.
Сяргей Крот belsat.eu