Паводле вынікаў атэстацыі ў Кваліфікацыйнай камісіі ў пытаннях адвакацкай дзейнасці ліцэнзіяў пазбавіліся яшчэ пяцёра адвакатаў.
Пасяджэння камісіі адбылося 31 жніўня. На ёй сярод іншага пераатэстоўвалі адвакатаў Менскай гарадской і Менскай абласной калегіяў адвакатаў.
Па выніках пасяджэння пяцёра спецыялістаў былі пазбаўленыя ліцэнзіяў на права надаваць паслугі. Іхныя ліцэнзіі былі спыненыя датаю разгляду – 31 жніўня 2023 года.
Згодна з фармулёўкаю камісіі, адвакатаў Яўгена Ляўковіча і Алену Халупку пазбавілі ліцэнзіяў «у сувязі з прымяненнем да іх тэрытарыяльнымі калегіямі адвакатаў дысцыплінарных спагнанняў у выглядзе выключэння з калегіяў за здзяйсненне ўчынкаў, не сумяшчальных са званнем адваката».
Вядома, што Алена Халупка ў 2020 годзе абараняла студэнтаў у палітычна матываваных справах аб іхным адлічэнні з ВНУ.
А адвакаты Сяргей Мядзведзеў, Ларыса Суслікава і Міхаіл Тарасюк пазбаўленыя ліцэнзіяў «у сувязі з прыняццем Кваліфікацыйнай камісіяй па выніках атэстацыі 10 жніўня 2023 года рашэнняў аб немагчымасці выканання адвакатамі сваіх прафесійных абавязкаў у выніку недастатковай кваліфікацыі».
Нагадаем, што ўлады Беларусі мэтанакіравана змагаюцца з адвакатамі, асабліва з тымі, якія выступалі абаронцамі ў палітычных справах. З пачатку 2020 года да канца красавіка 2023-га колькасць адвакатаў у краіне скарацілася з 2200 да 1650.
У 2021 годзе ў Закон аб адвакатуры былі ўнесеныя змяненні. З таго часу адвакаты могуць працаваць толькі пры юрыдычных кансультацыях. Загадчыкі кансультацыяў прызначаюцца толькі пасля ўхвалення кандыдатуры Міністэрствам юстыцыі.
Раман Шавель belsat.eu