Паводле звестак Нацыянальнага статыстычнага камітэту, цана жытла ў Беларусі ў I квартале 2024 года склала ў сярэднім 3012,1 рубля за м² – на 588 рублёў больш, чым у I квартале 2023-га.
На першасным рынку (новыя кватэры і дамы) цэны выраслі толькі на 12,9 %, тады як на другасным (перапродаж) – на 24,8 %. Найбольш падаражалі трохпакаёвыя кватэры на другасным рынку: на 27,6 %.
Сярэднія цэны, паводле Белстату, цяпер такія:
- 1-пакаёвая кватэра на першасным рынку: 4284,7 рубля за м².
- 2-пакаёвая кватэра на першасным рынку: 2566,3.
- 3-пакаёвая кватэра на першасным рынку: 2420,0.
- 4-пакаёвая і больш на першасным рынку: 3656,6.
- 1-пакаёвая кватэра на другасным рынку: 3530,7.
- 2-пакаёвая кватэра на другасным рынку: 2853,4.
- 3-пакаёвая кватэра на другасным рынку: 2819,3.
- 4-пакаёвая і больш на другасным рынку: 2720,5.
Чым выкліканы рост цэнаў пры змяншэнні насельніцтва краіны на цэлы Ваўкавыск, Белстат не тлумачыць. Але за I квартал 2024 года новага жытла ўвялі на 10,2 % менш, чым годам раней, а плошча новага жытла для тых, хто стаіць у чарзе на паляпшэнне жыллёвых умоваў, скарацілася на 30,4 %. Затое павялічылася ў 2,7 раза плошча арэнднага жытла.
Алесь Наваборскі belsat.eu
