Берасцейскі гарвыканкам скарэктаваў план святкавання Дня Перамогі, паведаміў 16 красавіка на брыфінгу старшыня выканкаму Аляксандр Рагачук, піша belta.by.
Кіраўнік Берасцейскага гарвыканкаму заявіў, што 9 траўня можна будзе прыйсці ў Берасцейскую крэпасць, каб ускласці кветкі, а масавыя імпрэзы хутчэй за ўсё забароняць.
«Я думаю, мы нікому забараняць прыходзіць у крэпасць ня будзем, гэта абсалютна не патрыятычна і не па-чалавечы. Але арганізоўваць калону, нейкія масавыя мерапрыемствы, мітынгі таксама, з вялікай доляй верагоднасці, ня будзем», – сказаў Аляксандр Рагачук.
Мясцовыя ўлады вырашылі не адмяняць святочны салют у Берасцейскай крэпасці і паабяцалі, што будуць «старацца разгрупаваць людзей».
16 красавіка на сайце Пінскага гарвыканкаму з’явіўся зварот да мясцовых жыхароў. У ім людзей просяць «не наведваць без крайняй неабходнасці месцы масавага знаходжання людзей», а таксама заклікаюць не выязджаць з гораду.
ЮВ belsat.eu