«Медсёстры плачуць ад стомы. На нас усім напляваць»: фельчар пра каронавірус у Салігорску
Афіцыйных звестак пра колькасць салігорцаў, якія захварэлі на COVID-19, Міністэрства аховы здароўя не падае. Няма каронавіруса – няма даплаты за працу з інфекцыяй. Грошы на прэміі вылучаныя, але не заплачаныя – сцвярджае фельчар Салігорскай станцыі хуткай дапамогі, што ў падначаленні цэнтральнай раённай больніцы. Медык распавёў belsat.eu, як адміністрацыя лякарні хавае рэальную колькасць хворых на COVID-19.
«Дапамагаюць нават бесхацінцы»
Аляксандр [імя змененае па просьбе героя. – Заўвага belsat.eu] працуе фельчарам на станцыі хуткай медычнай дапамогі Салігорску прыблізна пяць гадоў. Хваля атыповай пнеўманіі ў горадзе пачалася ў сакавіку, і з таго часу пацыентаў з запаленнем лёгкіх увесь час прыбывае. У Салігорскую ЦРБ прывозяць пацыентаў не толькі з гораду, але і з вобласці. Шмат калегаў Аляксандра зляглі з каронавірусам і не ў стане працаваць. Цяпер аналізы робяць нават медсёстры з ВІЧ, бо больш няма каму:
«Медсёстры з ВІЧ не могуць рабіць уколаў, але цяпер няма куды дзявацца. Калі адміністрацыю больніцы зверху пытаюць, ці што трэба, яны кажуць, што ўсё ёсць. Але гэта не так! Кожнаму выдалі рэспіратар – адзін рэспіратар на сем дзён працы! Нам неабыякавыя людзі збіраюць рэчы для індывідуальнай аховы, шахцёры пасля зменаў збіраюць рэспіратары. Прыносяць маскі нават бесхацінцы, якія з працягнутаю рукою стаяць каля крамаў».
Медыкі хварэюць не толькі праз адсутнасць сродкаў індывідуальнай аховы, але і праз людзей, якія хаваюць станоўчы вынік тэсту на каронавірус.
«Да нас вязуць з Берасця, Слуцку, Любані, Жыткавічаў. Там увогуле кашмар. Напрыклад, чалавеку баліць сэрца, прыязджаем, а ён тры дні тэмпературыць. Паказвае паперку, што ён COVID+. А мы без аховы! Народ не разумее, што адбываецца. У нас «зляцела» палова змены. Хварэюць усе – кіроўцы, фельчары».
Аляксандр з калегамі не вераць у афіцыйныя звесткі пра захварэлых і памерлых ад інфекцыі. Ён лічыць, што хаваюцца 95 % выпадкаў захворвання дзеля станоўчай статыстыкі. Тэсты губляюцца па дарозе са шпіталю ў эпідэміялагічную станцыю, паміж якімі лічаныя метры.
Дактарам непажадана дыягнаставаць каронавірус, дадае Аляксандр. Замест інфекцыі ў журналах рэгістрацыі запісваюць «№ 19» – «змены, тыповыя для COVID-19», і такіх запісаў большасць:
«У Салігорску нібыта няма каронавіруса, ёсць атыповая пнеўманія. А як даказаць? Грошы на даплаты прыйшлі. Быў сход з нагоды выплатаў. Маўляў, чакайце, выплацім. Але ж пратаколу не вялі. Стаўленне адміністрацыі такое: ты заразіўся, бо ехаў без маскі. А вы нам маску далі?»
Усе пяць гадоў на станцыі Аляксандр працуе ў адной уніформе, якая літаральна разыходзіцца па швах, таму мужчына ходзіць часам у вайсковым адзенні.
«За плотам у нас швейная фабрыка. Але танней чамусьці ў Менску замаўляць, чакаць 5-10 гадоў».
«Чорныя мяхі вывозяць цішком»
Каронавірус закрануў і сям’ю Аляксандра. Ягоныя бацькі падчапілі інфекцыю на пахаванні знаёмага напрыканцы красавіка ў вёсцы Старобін. Вернікі адкрылі труну з нябожчыкам. У родных першым сімптомам была задышка. Вынік аналізу – адмоўны – прыйшоў праз тры тыдні пасля іхнай шпіталізацыі. Аляксандр кажа, што гэта немагчыма:
«Я іх сам завозіў на КТ. У бацькоў была пнеўманія, тыповая для COVID-19. Уся сімптаматыка, змены ў лёгкіх. Дый якая пнеўманія ў траўні? Яны ляжалі ў больніцы ды бачылі, колькі ўначы на каталках вывозяць трупаў у чорных мяхах. Усё робяць цішком. Гэта мінус нам, не ўратавалі, але мы самыя абсалютна неабароненыя. Паміраюць і дзеці, і дарослыя».
Фельчар таксама пракаментаваў смерць доктара Уладзіміра Пісарыка. Раней у СМІ паведамлялі, што вынік на каронавірус у яго адмоўны, а ў больніцы справу не каментавалі, спасылаючыся на лекарскую таямніцу. Аляксандр не верыць, што ў працаўніка ЦРБ не было інфекцыі:
«Пісарык каля двух тыдняў ляжаў на апараце штучнай вентыляцыі лёгкіх у «бруднай зоне». Рэаніматолаг сам казаў, што ў яго COVID+. Яго хавалі ў закрытай труне».
«Мы ведалі, што будзе цяжка»
Суразмоўца распавёў і пра сітуацыю ў рэанімацыі ЦРБ. Усю брудную працу выконваюць медсёстры. Дзяўчаты плачуць ад стомы, адзінае іхнае жаданне – пайсці дадому:
«Усе проста стаміліся. У рэанімацыі медсёстры зашываюцца. Уявіце сабе, хаця б пераварочваць людзей з жывата на спіну. Доктар атрымае надбаўку, а што атрымае медсястра? Яны дзень у «бруднай зоне» працуюць, а пасля дзень у «чыстай». Плачуць ад стомы, кажуць толькі: «Хачу дадому». Ды ўвогуле, калі хуткая дапамога і больніца лягуць у шахцёраў, – цяжка будзе ўсім».
Аляксандр дадае: медыкі не б’юцца за надбаўкі, найбольш яны патрабуюць звычайнай удзячнасці.
«На нас усім напляваць. Прафсаюз не дапамагае. Не трэба грошай, тая ж адміністрацыя магла проста нам па-чалавечы падзякаваць за тое, што мы працуем цэлыя содні амаль без выходных».
Кіраўніцтва Салігорскай ЦРБ ад каментароў адмовілася. Калі ў прыёмнай пачулі пра «Белсат» – адказалі, што галоўная доктарка Вольга Белавус на відэаканферэнцыі. Пазней яна была на нарадзе, яшчэ пазней аказалася, што яна не на працоўным месцы ды не дасяжная для каментароў.
ДР belsat.eu
