Вярхоўны суд ліквідаваў апошнюю дэмакратычную Беларускую партыю левых «Справядлівы свет», паведамляе тэлеграм-канал «Позірк» са спасылкай на інфармаваныя крыніцы.
На думку чальцоў ліквідаванай партыі, з гэтага моманту ў Беларусі «больш няма партый» з «адрозным ад дзейнай улады поглядам на становішча спраў у краіне». У бліжэйшы час сябры «Справядлівага свету» зоймуцца стварэннем новай палітычнай партыі, якая будзе выступаць за «дэмакратычны і сацыялістычны шлях развіцця дзяржавы і грамадства».
У пачатку чэрвеня партыя падала дакументы на перарэгістрацыю без спісу сябраў – з меркаванняў бяспекі, аднак 30 чэрвеня Міністэрства юстыцыі ёй у гэтым адмовіў. 26 верасня Вярхоўны суд адхіліў скаргу на адмову ведамства перарэгістраваць «Справядлівы свет».
Раней, 20 верасня, Вярхоўны Суд задаволіў пазоў Міністэрства юстыцыі аб ліквідацыі перадапошняй апазіцыйнай Беларускай сацыял-дэмакратычнай партыі (Грамады). Таксама ўлетку і ў пачатку восені былі пазбаўленыя рэгістрацыі 9 апазіцыйных, праўладных і палітычна неактыўных палітычных структураў.
Нагадаем, што ў лютым 2023 года Аляксандр Лукашэнка падпісаў закон, які прадугледжвае змены ўмоваў стварэння і дзейнасці палітычных партыяў. Цягам шасці месяцаў Мінюст мусіць правесці перарэгістрацыю партыяў. Тыя партыі, што не пройдуць яе, будуць ліквідаваныя рашэннем Вярхоўнага Суда. Раней перарэгістрацыю прайшлі Рэспубліканская партыя працы і справядлівасці, Ліберальна-дэмакратычная партыя і Камуністычная партыя Беларусі. Сёлета таксама была зарэгістраваная новая партыя – «Белая Русь».
Алена Рувіна belsat.eu
