Каманда аналітыкаў Picodi Беларусь праверыла статыстыку пошукавых запытаў у Google і склала рэйтынг самых папулярных навагодніх падарункаў.
Рэйтынг заснаваны на параўнанні росту папулярнасці запытаў у пошукавай сістэме Google у снежні 2022 года з перыядам студзень – лістапад 2022 года (на аснове архіўных дадзеных сэрвісу Google Trends).
Сярод запытаў, якія разглядалі даследчыкі, былі розныя варыянты падарункаў: ад традыцыйных (шакалад, цацка, касметыка) да сучасных тэхналагічных прылад (смарт-гадзіннік, разумная калонка, увільгатняльнік паветра).
Статыстычныя даныя паказалі, што на званне самага папулярнага падарунка на навагоднія святы ў Беларусі прэтэндуе разумная калонка: колькасць запытаў узрасла на 311%.
На другім месцы апынуўся падарункавы набор (173%), які можа складацца з прысмакаў, чая, кавы ці касметыкі.
На трэцім і чацвёртым месцах – адзенне: піжама (132%) і швэдар (106%).
Замыкаюць пяцёрку лідараў сярод папулярных навагодніх падарункаў у Беларусі разумныя гадзіннікі (99%), якія адсочваюць фізічную актыўнасць, паведамляюць аб званках і паведамленнях.
А што ў суседзей?
У суседняй Польшчы ў якасці падарунка асаблівай папулярнасцю карыстаюцца касметычныя наборы, падарункавыя сертыфікаты і тэрмакубкі.
Украінцы таксама часцей за ўсё ў якасці прэзента выбіраюць падарункавы набор.
Расейцы аддаюць перавагу падарункавым наборам, смарт-калонкам і касметычным наборам.
У сусветным рэйтынгу падарункаў лідзіруюць падарункавы набор (510,3%), касметычны набор (257,3%) і падарункавы сертыфікат (149,9%). Акрамя таго, у пяцёрку ўвайшлі шалік (139,9%) і тэрмакубак (138,7%).
СП, belsat.eu