Гадавіна Рэвалюцыі гваздзікоў у Партугаліі і пясчаная бура ў Грэцыі. Фатаграфіі тыдня

Экаактывісты трымаюць плакаты з надпісам «Скончым з забруджваннем пластыкам!» падчас дэманстрацыі пластыкавых адкідаў з макетам Зямлі да Міжнароднага дня Зямлі ў Сеуле, Паўднёвая Карэя. 22 красавіка 2024 года.

Следчы ўкраінскай паліцыі аглядае абломкі Харкаўскай тэлевежы пасля расейскага ўдару па вежы на ўскраіне Харкава, Украіна. 22 красавіка 2024 года.

Літоўска-польскія вайсковыя вучэнні Brave Griffin 24/II каля сувальскага калідору ў вёсцы Дырмішкес (Dirmiškės), Літва. 26 красавіка 2024 года.

Жанчыну (у белым) збівае палкай чалец шарыяцкай паліцыі ў пакаранне за тое, што тая была ў пазашлюбных стасунках з мужчынам. Банда-Ачэг (Banda Aceh), Інданезія. 25 красавіка 2024 года.

Сябры і сваякі загінулага салдата слухаюць гімн Украіны падчас цырымоніі пахавання фельчара ўкраінскай арміі Назара Лаўроўскага, якому быў 31 год, на Майдане незалежнасці ў Кіеве. Лаўроўскі загінуў 18 красавіка падчас эвакуацыі параненых вайскоўцаў з лініі фронту ў Харкаўскай вобласці. Кіеў, Украіна. 24 красавіка 2024 года.

Самая вялікая плантацыя цюльпанаў у Польшчы. Блотнік (Błotnik), Польшча. 26 красавіка 2024 года.

90-гадовая Сэлэшці Каэйру ўручае чырвоныя гваздзікі вайскоўцам, якія бралі ўдзел у Рэвалюцыі гваздзікоў 25 красавіка 1974 года, вайсковага перавароту, які паклаў канец самай доўгай дыктатуры ў Еўропе, дыктатара Антонью ды Алівэйра Салазара. Лісабон, Партугалія. 25 красавіка 2024 года.

Жыхары трушчобаў у сталіцы Кеніі выкарыстоўваюць сцяну, каб перайсці затопленае школьнае поле пасля залеваў і раптоўных паводак. Найробі, Кенія. 24 красавіка 2024 года.

Армяне бяруць удзел у штогадовым маршы з паходнямі напярэдадні Дня памяці ахвяраў генацыду – 109-ай гадавіны масавых забойстваў армянаў падчас Першай сусветнай вайны пад уладай Асманскай імперыі ў 1915 годзе. Ерэван, Арменія. 23 красавіка 2024 года.

Мужчына падымаецца на пагорак, пакуль афрыканскі пыл з пустэльні Сахара ахутвае Афіны, Грэцыя. 23 красавіка 2024 года.