Без усеагульных выбараў і фінансавай адкрытасці атрымліваецца не раскол элітаў і кансалідацыя дэмакратычных сілаў, а раскол дэмакратычных сілаў, заяўляе Валерый Цапкала, штаб якога ў 2020 годзе падтрымаў Святлану Ціханоўскую.
Паўгода таму Святлана Ціханоўская абвясціла аб стварэнні Аб’яднанага пераходнага кабінету як часовага – на паўгода – выканаўчага органу. Меркавалася, што чальцы Кабінету мусяць прайсці ўхваленне Каардынацыйнай радай як прадстаўнічым органам. Раду якраз амаль дарэфармавалі, выбралі абноўлены склад.
Валерый Цапкала – колішні дыпламат і былы дырэктар заснаванага ім Парку высокіх тэхналогіяў – у 2020 годзе збіраўся балатавацца ў прэзідэнты. Яго не пусцілі: Цэнтральная выбарчая камісія заявіла, што са 160 тысяч сабраных за яго подпісаў сапраўднымі былі толькі 75 тысяч. Не пусцілі ў кандыдаты і Віктара Бабарыку – экс-кіраўніка «Белгазпрамбанку», на той момант ужо зняволенага. Штабы Бабарыкі і Цапкалы аб’ядналіся са штабам Ціханоўскіх – Святлана пайшла ў кандыдаты замест зняволенага мужа Сяргея Ціханоўскага.
Пасля выбараў-2020 кіраўніца выбарчага штабу Валерыя Цапкалы, ягоная жонка Вераніка Цапкала прызнавала Ціханоўскую легітымнай прэзідэнткай і казала, што Аляксандр Лукашэнка прайграў выбары. Затым шляхі Ціханоўскай і Цапкалы разышліся. На канферэнцыі «Новая Беларусь» перад абвяшчэннем Кабінету Вераніка Цапкала паспрачалася з Ціханоўскай і распавяла, што «засталася на ўзбочыне».
«Белсат» папрасіў Валерыя Цапкалу пракаментаваць паўгода працы Кабінету. Крытыка Цапкалы зводзіцца да трох галоўных пунктаў.
Цапкала заяўляе, што і офіс Ціханоўскай, і Кабінет, і Каардынацыйная рада – «фэйкавыя структуры», «прызначаныя адным чалавекам», бо беларускі народ не браў удзелу ў выбары чальцоў гэтых структураў, не ўпаўнаважваў распрацоўваць праграмы.
За іншыя ўрады ў выгнанні людзі галасавалі, упэўнены Цапкала. Ён прывёў у прыклад польскі ўрад у выгнанні, створаны пасля акупацыі Польшчы нацыстамі і саветамі ў 1939 годзе. Аднак менавіта гэты ўрад быў сфармаваны не дэмакратычным шляхам: тады законны ўрад Польшчы ўцёк у Румынію і быў там інтэрнаваны, а на выбар прэзідэнта ўраду ў выгнанні ўплывала Францыя.
Ціханоўскую не выбіралі дзеля таго, каб яна стварала ўрад, перакананы Цапкала. У 2020 годзе людзі «пратэставалі за каштоўнасці»: вызваленне палітвязняў і спыненне гвалту, правядзенне свабодных выбараў з магчымым удзелам вызваленых лідараў. Выбар тады быў не між Лукашэнкам і Ціханоўскай, тлумачыць ён:
«Стаяў іншы выбар у кожнага ў галаве: я выходжу за маё права быць грамадзянінам, за маё права выстаўляцца кандыдатам і галасаваць, за каго я хачу», – апісвае Цапкала пратэсты 2020 года.
Людзей тады падкупала тое, што Ціханоўская і аб’яднаны штаб казалі, што яны «не пра атрыманне ўлады», працягвае Цапкала, а фармаванне Кабінету дыскрэдытавала гэтую ідэю. У Кабінет увайшлі людзі, якія, на думку Цапкалы, «наогул не прымалі ўдзелу ў палітычных падзеях 20-га года», і за гэтых людзей беларусы не пойдуць на пратэсты – а пойдуць за каштоўнасці свабодных выбараў.
Яго абурае і рэформа Каардынацыйнай рады – ён лічыць, што дэлегатаў фактычна прызначалі, а не выбіралі (размовы пра ўсеагульныя выбары былі, але адмову ад іх патлумачылі тэхнічнымі прычынамі і пытаннямі бяспекі). І тое, што каманда Ціханоўскай распрацоўвае праграмы, як то эканамічную і сацыяльную, а беларусы не могуць прагаласаваць за гэтыя праграмы ці супраць іх. Выходзіць, кажа Цапкала, што фактычна ўсё вырашае адзін чалавек – як у рэжыме Лукашэнкі.
На думку Цапкалы, усеагульныя выбары нават у цяперашніх умовах рэальна арганізаваць. Сучасныя тэхналогіі гэта дазваляюць – і нават даюць магчымасць гейміфікацыі працэсу, ператварэння галасавання ў форме гульні на смартфоне, якая зацягвае. Ён лічыць, што выбары варта правесці не на беларускай платформе, а на гатовай замежнай (бо тую ж супольнасць «Сумленныя людзі» можна назваць палітычна ангажаванай), з гарантыямі бяспекі і тэхналогіяй блокчэйну для праверкі галасоў.
Цапкала кажа, што на такія выбары ён якраз спрабуе сабраць грошы. Сума патрэбная не такая і вялікая: сумарна, лічыць ён, трэба каля мільёна долараў, і ўласна праграма будзе каштаваць 250 тысяч долараў (на гэта ўжо праводзілі тэндар, расказаў Цапкала), а астатняе пойдзе на прома-кампанію выбараў «з усіх скрыняў» у Беларусі.
Цапкала перакананы, што «асноўнымі фінансавымі бенефіцыярамі» беларускіх пратэстаў «сталі тыя, хто нічым не рызыкаваў», і беларусы бачаць, што «хтосьці на гэтым грошы зарабляе».
Ён заяўляе, што Еўропа вылучыла на дэмакратычныя сілы Беларусі 100 млн еўра, столькі ж вылучылі разам узятыя амерыканцы, брытанцы і канадцы (сапраўды, называлі лічбы ў 100 млн еўра на год сумарна ад Еўразвязу, ЗША і іншых краінаў Захаду на ўсю дапамогу Беларусі). Ён таксама згадвае адсутнасць свежых справаздачаў па дзейнасці фондаў салідарнасці і адсутнасць звестак пра заробак платформаў, прэтэнзіі да празрыстасці заробкаў дарадцы Ціханоўскай Франака Вячоркі.
Цапкала сцвярджае, што ніхто не ведае, куды пайшлі гэтыя грошы, у тым ліку праз падпісанне людзьмі, звязанымі з гэтымі сродкамі, угодаў аб неразгалошванні (NDA, якія сапраўды падпісвалі тыя, хто працаваў з Офісам Ціханоўскай). NDA, прызнае ён, гэта нармальная з’ява для камерцыйных кампаніяў, але ж дэмакратычныя сілы, заўважае Цапкала, фінансуюць у тым ліку з грошай платнікаў падаткаў іншых краінаў.
Асноўнай задачай праціўнікаў Лукашэнкі на цяперашнім этапе Цапкала бачыць стварэнне расколу элітаў у дзейнай уладзе, бюракратычным апараце. Для гэтага патрэбная выразная праграма транзітнага перыяду.
«Тыя людзі, якія знаходзяцца сёння ў сістэме, у сілавых структурах, дзяржаўным апараце, яны ўсё жыццё аруць, усё жыццё робяць кар’еру, – кажа Цапкала. – Сёння гэта пазіцыянавалася такім чынам, што хтосьці прыйдзе з нейкім кадравым рэзервам і пашле іх».
Ён крытыкуе кампанію «Кадравы рэзерв» Аб’яднанага пераходнага кабінету: падрыхтоўку спецыялістаў для працы ў камандзе рэформаў будучай Новай Беларусі. Такога, кажа Цапкала, каб кадравы рэзерв фармаваў «дырэктар тэатру ці дырэктар цырку» (відавочны намёк на Паўла Латушку, экс-дырэктара Купалаўскага тэатру), няма ні ў дэмакратычных краінах, ні нават пры камуністах.
Трэба, працягвае ён, каб былі зразумелыя прынцыпы, паводле якіх людзей бяруць на дзяржаўную службу. Нават калісьці ў Савецкім Саюзе або ў цяперашнім Кітаі чыноўнікі канкуравалі за пасады, адбываліся галасаванні, былі вядомыя шляхі па «кар’ернай лесвіцы» і «сацыяльныя ліфты», была пэўная адказнасць перад народам.
А цяпер выходзіць, паводле Цапкалы, што высякаецца вялізная частка дзяржаўнага апарату, робіцца ворагамі. Эліты ўспрымаюць гэта як пагрозу. Цапкала пытае: хто з лукашэнкаўскіх элітаў пасля такога пойдзе размаўляць з Ціханоўскай? З выбраным прадстаўнічым органам будуць размаўляць, верыць ён.
Калі стварыць выбраны народам інстытут, калі інстытут у адкрытай дыскусіі сфармулюе выразныя прынцыпы і крытэры індывідуальнай адказнасці за парушэнні закону, то эліты будуць з ім размаўляць, перакананы Цапкала. Ён згадвае нядаўнія скандалы з амерыканскім кангрэсменам Джорджам Сантасам, якога шмат разоў лавілі на хлусні: як бы не быў дыскрэдытаваны гэты канкрэтны кангрэсмен, выбраны дэмакратычным шляхам, кажа Цапкала, гэта не ўплывае на давер Кангрэсу агулам як інстытуту.
Алесь Наваборскі belsat.eu