Праз непагадзь у Беларусі 7 жніўня з графіку выбіўся 51 пасажырскі цягнік. Спазненне склала ад 6 хвілінаў да амаль двух гадзінаў, паведаміла Беларуская чыгунка на сваім сайце.
Навальнічны фронт прынёс у Беларусь моцны вецер, у выніку шмат дрэваў пападалі на рэйкі ды абарвалі лініі электразабеспячэння. Наступствы непагадзі распаўсюдзіліся на 335 кіламетраў чыгуначных пуцей.
Адбыўся збой у руху 51 пасажырскага цягніка. У пункты прызначэння яны прыбылі са спазненнем ад 6 хвілінаў да 1 гадзіны 46 хвілінаў.
У паведамленні БЧ адзначаецца, што наступствы ўрагану ліквідавалі больш за 500 асобаў, было задзейнічана 75 адзінак тэхнікі. Электрычнасць на 41 чыгуначнай станцыі забяспечылі з дапамогаю дызельных генератараў.
На чыгунцы ў выніку непагадзі ніхто не пацярпеў.
Зараз на некалькіх участках яшчэ трывае праца дзеля ўзнаўлення электразабеспячэння: Магілёў – Крычаў, Віцебск – Азярышча, Ворша – Віцебск, Полацк – Крулеўшчызна. Там магчымыя затрымкі ў руху цягнікоў.
Моцны вецер і дажджы прайшлі 7 жніўня амаль па ўсёй тэрыторыі Беларусі. У некаторых раёнах знікла электрычнасць, зафіксавана шмат выпадкаў падзення дрэваў, вуліцы гарадоў пераўтварыліся ў рэкі.
На беразе Вялейскага вадасховішча дрэва, што ўпала, насмерць прыдушыла мужчыну, які адпачываў там разам з жонкаю і дзвюма сынамі.
Сяргей Крот belsat.eu
