28 чэрвеня ў сталіцы Украіны ладзяць акцыю падтрымання беларускіх пратэстоўцаў.
Марш салідарнасці з Беларуссю пачаўся на Майдане незалежнасці, пасля чаго ўдзельнікі акцыі ўшанавалі памяць беларусам Міхася Жызнеўскага, які загінуў у 2014 годзе ў Кіеве падчас Рэвалюцыі годнасці.
Пасля дэманстранты вярнуліся на Майдане незалежнасці, дзе адбыліся выступы палітыкаў.
«Калі пачалася Рэвалюцыя годнасці, то і Статкевіч, і Севярынец былі ў турмах, але беларусы прыязджалі і на другі Майдан, выступалі са сцэны Майдану. Адным з тых, хто выступаў, быў адзін з лідараў «Еўрапейскай Беларусі» Максім Вінярскі. Сёння ён таксама ў турме. Давайце будзем разам і будзем справядлівыя», – заявіў адзін з лідараў Руху салідарнасці «Разам» Вячаслаў Сіўчык.
Пасля ўдзельнікі акцыі скіраваліся да амбасады Беларусі, каб там правесці пікет.
«Прыйшоў у салідарнасць з народам – не народцам – Рэспублікі Беларусі. Людзі, памятайце: калі вы стаіце на вуліцы і хапаюць нейкага чалавека – няважна ведаеце вы яго ці не – будзьце салідарныя, адбівайце народ. Не давайце хапаць народ. Памятайце, што на іх месцы могуць апынуцца вашыя сваякі, вашыя родныя, вашыя сябры», – заявіў у каментары belsat.eu удзельнік акцыі Аляксандр Мягерскі.
Акцыі салідарнасці з Беларуссю праходзяць у розных краінах свету. Напрыклад, у Варшаве 27 чэрвеня падтрымаць беларускіх пратэстоўцаў выйшлі не менш як 1000 чалавек.
МГ belsat.eu