Міністэрства аховы здароўя афіцыйна пацвердзіла, што ў Беларусі зафіксавана яшчэ два выпадкі заражэння каронавірусам.
Учора Міністэрства аховы здароўя Беларусі паведаміла пра чацвёрты выпадак каронавірусу і адзначыла, што яшчэ 2 тэсты пацыентаў, якія адносяцца да кантакту 1-га ўзроўню, папярэдне дэманструюць пазітыўныя вынікі і цяпер праводзіцца дадатковая лабараторная дыягностыка. Сёння заражэнне каронавірусам гэтых двух пацыентаў было афіцыйна пацверджана.
Такім чынам, у Беларусі зафіксавана шэсць выпадкаў каронавірусу – чатыры ў Менску і два на Віцебшчыны.
Пра першы пацверджаны выпадак захворвання каронавірусам у Беларусі стала вядома 27 лютага. Вірус быў знойдзены ў іранскага студэнта, які прыляцеў з Баку 22 лютага.
Па стане на раніцу 4 сакавіка, агулам у свеце колькасць захварэлых на каронавірус складае 92 796 чалавек. З іх 80 270 захварэлі ў Кітаі. Памерлі ад каронавірусу 3 201 чалавек, у тым ліку 2 981 у Кітаі. Амаль 50 тысяч чалавек выздаравелі, піша South China Morning Post.
Акрамя Кітаю найбольш пацярпелі ад каронавірусу Паўднёвая Карэя (5 328 інфікаваных, 32 загінулых), Іран (2 336 інфікаваных, 77 памерлых) і Італія (2 263 інфікаваных, 79 памерлых).
ІІ belsat.eu
