Ужо ўвосень падчас перапісу насельніцтва грамадзяне Беларусі адкажуць на шэраг пытанняў. Адным з іх будзе пытанне пра родную мову. Нобэлеўская лаўрэатка, пісьменніца Святлана Алексіевіч ужо ведае, якую мову пазначыць роднай.
«Канечне ж, я беларуска, і, канечне ж, мая родная мова – беларуская, хоць я на ёй не размаўляю, паколькі ўся практыка майго жыцця – гэта расейская мова, расейская культура. Але я адчуваю сябе беларускай, што я на беларускай зямлі, гэта мая зямля, у мяне бацька адсюль. Я іншага жыцця не ведаю, нягледзячы на тое, што я жыла ў Еўропе і шмат дзе ў свеце. Але мая зямля – Беларусь», – кажа Святлана Алексіевіч.
Святлана Алексіевіч адзначае, што мова – гэта яшчэ і важны фактар бяспекі Беларусі.
«Чым хутчэй адбудзецца ў людзей у галаве працэс самаідэнтыфікацыі, кожны з нас скажа: «Я беларус! Гэта мая зямля, зямля маіх дзяцей! І я буду вырашаць, што тут рабіць», – тым хутчэй зменіцца нашае жыццё», – лічыць нобэлеўская лаўрэатка.