Расейскае таварыства з абмежаванай адказнасцю «Управляющая компания «ДаВинчи» высунула прэтэнзіі да ўладаў нашай краіны. Кампанія накіравала позву ў Міжнародны суд. Гэта вынікае з пастановы Саўміна № 55 ад 28 студзеня.
Позва будзе разглядацца ў Міжнародным камерцыйным арбітражным судзе пры Гандлёва-прамысловай палаце Расейскай Федэрацыі. Міністэрству юстыцыі Беларусі даручана выступіць у якасці прадстаўніка ўрада Беларусі, вынікае з дакументу, піша TUT.BY.
Мінюсту таксама прадстаўлена права ў выпадку неабходнасці прыцягваць па гэтай справе экспертаў, спецыялістаў у галіне права.
Інфармацыя пра сутнасць рознагалоссяў і патрабаванні расейскага боку ў пастанове Саўміну не прыводзіцца.
У Міжнародным камерцыйным арбітражным судзе не раскрываюць падрабязнасцяў справы. Атрымаць каментары ў Мінюсце і «УК« ДаВинчи» не ўдалося.
Згодна з расейскім рэестрам юрыдычных асобаў, уласнікам «УК «ДаВинчи» з’яўляецца Андрэй Уладзіміравіч Северылаў. Чалавек з такімі ж ініцыяламі быў заснавальнікам кампаніі «Параллель.ЮК», якая ў 2017 годзе ўжо прадʼяўляла прэтэнзіі да ўладаў Беларусі ў межах банкруцтва Асіповіцкага вагонабудаўнічага заводу і падзелу бізнесу. «Параллель.ЮК» стала крэдыторам заводу пасля таго, як выкупіла запазычанасці аднаго з расейскіх банкаў. Летам мінулага года Міжнародны камерцыйны арбітражны суд адмовіў у позве «Параллель.ЮК» супраць Рэспублікі Беларусь.
Андрэй Северылаў таксама зʼяўляецца акцыянерам расейскага «Локо-Банка», як і Міхаіл Рабіновіч, якому прыпісваюць адну з ключавых роляў пры стварэнні вагонабудаўнічага заводу ў Асіповічах. У «холдынгавай кампаніі «ДаВинчи» 90 % долі належыць Рабіновічу, 10 % – Северылаву.
СК, belsat.eu