«Польшча адгукнулася першай!» У Беларусь прыбыў гуманітарны канвой з медычнай дапамогай
25 тысяч масак і 7,5 тысяч літраў дэзынфікуючых сродкаў сёння прыбылі з Польшчы адно для Гарадзеншчыны. Яшчэ большая колькасць дапамогі ў хуткім часе даедзе да Менску ды іншых беларускіх гарадоў.
Калона з шасці грузавых аўто ўчора выехала з Варшавы і ўжо сёння раніцай перакрочыла польска-беларускую мяжу. Гэта дапамога з боку Ураду Польшчы ды адпаведных фондаў для лякарняў Беларусі. Канвой зарганізаваў Фонд міжнароднай салідарнасці, транспартаваннем займаліся супрацоўнікі пажарнай службы Польшчы.
«Калі надыходзяць цяжкія часы, то праяўляюцца якасці суседзяў»
Капітан пажарнай службы Якуб Січэк, які суправаджае канвой, распавядае, што ў Горадню і Воранава трапіць 25 тысяч масак і 7,5 тысяч літраў дэзынфікуючых сродкаў. У Менск, у сваю чаргу, ужо сёння будзе дастаўлена 70 тыс літраў дэзынфекцыі, 75 тыс масак і 1000 адзінак лекаў. Адтуль, магчыма, дапамога будзе размеркаваная і ў іншыя гарады. Паводле капітана, праблемаў з пераездам мяжы не было, а сам фармат супрацы ён характарызуе станоўча.
– Гэта адказ на ініцыятыву беларускага боку, які звярнуўся да некалькіх дзяржаваў па дапамогу, – кажа генеральны консул РП Яраслаў Ксёнжэк. – Наколькі я ведаю, Польшча адгукнулася першай! Мы суседзі і вельмі хочам быць добрымі суседзямі, якія дапамагаюць адно аднаму, асабліва ў бядзе. Калі добра – то добра, але калі надыходзяць цяжкія часы, тады акурат праяўляюцца якасці суседзяў. Маю надзею на працяг падобнай супрацы і ў цяжкія, і ў добрыя часы.
«Пандэмія закрыла межы, але яна аб’ядноўвае людзей»
Першым прыстанкам гуманітарнага канвою па беларускім баку стала Гарадзенская абласная інфекцыйная клінічная лякарня. Там патрэбную колькасць дапамогі выгрузілі працоўныя ў масках ды касцюмах хімічнай абароны.
Паводле галоўнага лекара больніцы Сяргея Ціхановіча, дапамога пойдзе на апрацоўку боксаў і памяшканняў, дзе знаходзяцца пацыенты з каронавіруснай інфекцыяй, а таксама для абароны медперсаналу.
– Сітуацыя на сёння ў Гарадзенскай вобласці стабільная. Колькасць дабаўляецца, але не тымі тэмпамі, якіх мы чакалі. Таму лавінападобнага паступлення пацыентаў няма. Лабараторыі працуюць за кошт павелічэння колькасці абследаванняў, – кажа сп. Ціхановіч.
Сама інфекцыйная лякарня запоўненая не поўнасцю: толькі першае аддзяленне, застаецца яшчэ рэзерв. На сённяшні момант тут ляжыць 102 чалавекі з COVID-19.
– Па сродках абароны мы цалкам забяспечаныя, але маем быць гатовыя да кожнага варыянту развіцця падзеяў. Па Гарадзенскай вобласці найменшая колькасць інфікаваных па краіне. У нас 190 чалавек на ўчорашні дзень інфікаваных каронавірусам. Калі казаць пра іншыя вобласці, то там, канешне, нашмат большыя лічбы, – кажа лекар.
Сяргей Ціхановіч вельмі дзякуе польскаму боку, бо дапамога для Гарадзеншчыны вельмі своечасовая.
– Пандэмія зачыніла межы, але яна аб’ядноўвае людзей, – дадае медык на развітанне.
Глядзіце ўсе фоты:
АК, ПЯ, фота Васіль Малчанаў belsat.eu
