Прычым больш за 25 тысячаў самастойна падалі заявы. Такія звесткі падае ЦВК.
Больш за 70 тысячаў беларусаў падалі заявы на ўдзел у выбарчых камісіях. Большасць з іх самастойна вырашылі ўвайсці ў склад камісіяў праз падачу заяваў. Такіх – 25 354 чалавек. На другім месцы – прадстаўнікі беларускай Федэрацыі прафсаюзаў (9 537 заявак), старшыня якой, Міхаіл Арда, з’яўляецца кіраўніком ініцыятыўнай групы Лукашэнкі. На трэцім месцы – прадстаўнікі грамадскага абʼяднання «Белая Русь» (4 661 чалавек).
Некалькі чалавек падаліся і ад беларускіх апазіцыйных партыяў. Напрыклад, 109 чалавек ад БНФ, 212 чалавек – ад Абʼяднанай грамадзянскай партыі, таксама 212 заявак – ад Беларускай сацыял-дэмакратычнай партыі («Грамада»).
У выбарчыя камісіі, якія выдаюць выбарцам бюлецені, а потым лічаць галасы, можна патрапіць ад грамадскіх абʼяднанняў, працоўных калектываў, а таксама сабраўшы 10 подпісаў ад жыхароў свайго ўчастку.
На выбарах 2015 года ў склад камісіяў увайшлі 67 185 чалавек. Абсалютную большасць (71,2 %) склалі жанчыны. Амаль палова, 44,1 %, патрапілі ў участковыя камісіі ад грамадскіх абʼяднанняў.
КТ belsat.eu