Беларусь і Расею чакаюць адзіныя валюта і парламент? На гэта намякнуў прэс-сакратар МЗС

Прэс-сакратар Міністэрства замежных справаў Беларусі заявіў, што паглыбленне інтэграцыі Беларусі і Расеі не выйдзе за межы саюзнай дамовы 1999 года, але гэты дакумент, сярод іншага, кажа пра адзіную валюту, адзіны парламент, сімволіку і адзінае рэгуляванне.

Падчас брыфінгу 20 верасня прадстаўнік МЗС Анатоль Глаз заявіў, што ажыятаж, які паўстаў вакол паглыблення інтэграцыі Беларусі і Расеі, створаны цалкам на пустым месцы і для яго няма фактычных падставаў.

«Хацеў бы яшчэ раз нагадаць поўнае найменне дакументу – Праграма дзеянняў Рэспублікі Беларусь і Расейскай Федэрацыі для рэалізацыі палажэнняў Дамовы аб стварэнні Саюзнай дзяржавы. Менавіта ў гэтай назве і закладзены яго сэнс. Нічога, што выходзіць за межы Саюзнай дамовы 1999 года, там быць не можа», – сказаў ён.

Разам з тым дамова 1999 года паміж Беларуссю і Расеяй прадугледжвае сярод іншага стварэнне агульнага парламенту, Савету міністраў, суду. Таксама Саюзная дзяржава мусіць мець свае герб, сцяг, гімн, адзіную валюту.

Апроч таго, у аб’яднанні дзвюх краін мусяць быць адзіная грашова-крэдытная, валютная, падатковая і коштавая палітыка; адзіныя правілы канкурэнцыі і абароны правоў спажыўцоў; аб’яднаныя транспартная і энергетычная сістэмы; адзіная гандлёвая і мытна-тарыфная палітыка; адзінае заканадаўства аб замежных інвестыцыях і іншыя функцыі.

МГ belsat.eu