Омбудсман паведаміў пра 19 затрыманых у Батумі на акцыі супраць лайнера з расейскімі турыстамі
Офіс упаўнаважанага ў правах чалавека ў Грузіі паведаміў, што ў Батумі на акцыі супраць прыбыцця лайнера з расейскімі турыстамі затрымалі 19 асобаў. Паліцыя сцвярджае, што арыштаваных меней – дзевяцёра.
Раніцою ў Батумі адбылася акцыя пратэсту супраць прыбыцця круізнага лайнера з расейскімі турыстамі. У дэманстрацыі бралі ўдзел у тым ліку беларусы. Паводле звестак паліцыі, былі затрыманыя 9 дэманстрантаў, паведамляе тэлерадыёкампанія «Імэдзі». Актывістаў абвінавацілі ў злосным хуліганстве і непадпарадкаванні сілавікам.
У заяве омбудсмана Грузіі гаворыцца пра 19 затрыманых, сярод іх – грамадзянка Украіны:
«Прадстаўнік омбудсмана сустрэўся з трыма арыштаванымі, адзін з іх распавёў пра факт гвалту з боку супрацоўнікаў паліцыі. Пракуратура неадкладна праінфармавала Спецыяльную следчую службу аб меркаваным неналежным абыходжанні з грамадзянінам і чакае хуткага і эфектыўнага рэагавання».
Сярод пасажыраў лайнера «Astoria Grande», як перадае батумскі тэлеканал TV25, зоркі расейскага музычнага тэлеканалу RU.TV, якія падтрымоўваюць вайну супраць Украіны. Сярод іх – беларускі спявак Дзмітрый Калдун.
Пасажыраў лайнера выводзілі на бераг пад узмоцненай аховай паліцыянтаў. Мікрааўтобусы, на якіх турыстаў вывозілі з порту, пратэстоўцы закідвалі бутэлькамі і яйкамі.
Тым часам на вечар прызначаныя новыя акцыі пратэсту, з такімі заклікамі, у прыватнасці, выступіў грузінскі Моладзевы рух.
На лайнеры «Astoria Grande» ладзяць круізы па Чорным моры з Сочы ў турэцкія гарады з транзітным наведваннем Батумі. Праўда, з маршрутаў наступных тураў гэты грузінскі горад ужо прыбралі.
Улады Грузіі адзначаюць, што гэты карабель не пад санкцыямі і можа свабодна заходзіць у розныя парты свету.
Сяргей Крот belsat.eu
