Кобрынскі чыноўнік і «моцны гаспадарнік» Дзмітрый Місюк са сваймі злоўжываннямі не першы год трапляе ў поле зроку беларускіх медыяў. Але ўсё гэта не перашкаджае яму займаць кіроўных пасадаў і надалей парушаць правы рабочых.
Дзмітрый Місюк працаваў галоўным ветэрынарам Кобрынскага раёну, пакуль яго ў снежні 2011 года не прызначылі дырэктарам Кобрынскай птушкафабрыкі.
У 2012 годзе Місюк ужо балатаваўся ў парламент ад праўладнай Рэспубліканскай партыі працы і справядлівасці. Але выконваў перадусім ролю кандыдата-спойлера для дзейнага дэпутата Аляксандра Зазулі, на карысць якога і зняўся з «выбараў». Самога Місюка праз два гады пасля гэтага зрабілі дэпутатам Кобрынскага райсавету, дзе перад тым старшынёю была Таццяна Місюк. Ці звязаныя паміж сабою гэтыя Місюкі, невядома.
У пачатку 2016 года кобрынскі дэпутат пайшоў на павышэнне ў суседні Драгічынскі раён, дзе заняў пасаду намесніка старшыні выканкаму, адказнага за сельскую гаспадарку.
«Скажыце, якая яшчэ еўрапейская краіна можа пахваліцца тым, што ў яе ўся вырабленая сельскагаспадарчая прадукцыя запатрабаваная? Дайце толькі якасць і аб’ём. А далей – трэба думаць і зніжаць выдаткі», – распавядаў чыноўнік у снежні 2016-га.
Праўда, вынікі ягонай працы былі далёкія нават ад папярэдніх: то вясна занадта вільготная, то лета занадта засушлівае.
У хуткім часе Місюк з Драгічынскага вярнуўся ў родны Кобрынскі раён. З пасады намесніка старшыні Драгічынскага райвыканкаму – на пасаду намесніка старшыні калгасу «Батчы», дзе з ім упершыню і пазнаёміліся карэспандэнты «Белсату» ў снежні 2017 года. Паводле праваабаронцаў, нягледзячы на сваю пасаду намесніка, былы дэпутат кіраваў «яшчэ больш за таго, хто кіруе калгасам». Прычынаў, з якіх так рэзка панізілі чыноўніка, знайсці не ўдалося.
У сваім інтэрв’ю драгічынскім журналістам Місюк дзякаваў працаўнікам сяла «за няпростую, самаадданую працу, за адданасць зямлі і хлебаробскай справе», нізка кланяўся «ветэранам галіны за іх унёсак у дасягненні сённяшняга дня» і жадаў «усім моцнага здароўя, дабрабыту». Але ж рэчаіснасць была іншай.
Час працы калгаснікам у «Батчах» павялічвалі без адпаведнай аплаты, а маці васьмёх дзяцей з 23-гадовым стажам працы пасля інфаркту і клінічнай смерці так загружалі дадатковаю працаю, што жанчына зноў трапіла ў шпіталь.
Што цікава, пра злоўжыванні функцыянера пісала нават дзяржаўная «СБ» у студзені 2018-га. Тады малады заатэхнік з калгасу распавядала, як Місюк з дырэктарам прымушалі яе звольніцца, пазбаўлялі надбавак і гэтак далей. Прычым ахвяраю ціску стаў нават муж калгасніцы:
«Патэлефанаваў Дзмітрый Місюк і сказаў: маўляў, праз выхадкі тваёй жонкі [зварот у газету. – Заўвага рэд. Belsat.eu.] шукай працу. Жонку мы патрываем, а ты з заўтра пішы заяву на ўласнае жаданне».
Праўда, чыноўнікі з Міністэрства адукацыі і Берасцейскага аблвыканкаму зрабілі вінаватаю менавіта заатэхніка, спісаўшы ўсё на канфлікт пакаленняў і тое, што «не ўсе абітурыенты ўсведамляюць цяжкасці, з якімі давядзецца сутыкнуцца пасля заканчэння ВНУ».
З калгасу «Батчы» чыноўнік сышоў, але неўзабаве з’явіўся ў новым. У лістападзе 2019 года яго, тады ўжо намесніка ААТ «Стрыгава», узнагародзілі ганароваю граматаю Кобрынскага райвыканкаму.
Са «Стрыгава» Місюка занесла ў Камянецкі раён. Там ён у 2020 і 2021 гадах кіраваў сельгаспрадпрыемствам «Александрыя-Агра». Тады не надта хуткія тэмпы жніва выканальнік абавязкаў дырэктара тлумачыў тым, што «частку збожжавых і зернебабовых культураў моцныя дажджы прыбілі да зямлі».
І вось сёлета, змяніўшы за няпоўныя 6 гадоў з паўдзясятка месцаў працы ў трох раёнах Берасцейшчыны, Дзмітрый Місюк прыйшоў на пасаду намесніка дырэктара ў «Гарадзец-Агра» Кобрынскага раёну.
Як распавядаюць мясцовыя жыхары, «моцны гаспадарнік» не толькі працягвае ціснуць на сваіх падначаленых, але і ўвогуле нядбайна ставіцца да даручанага прадпрыемства.
«На яго ўвесь час скардзяцца», – кажуць мясцовыя жыхары.
Гэтак, каровам у стойлах не падкладаюць кармоў. А хворых жывёлінаў, выцягнуўшы з комплексу, проста кідаюць на зямлю, нават не спрабуючы іх вылечыць. Збожжавыя палі так апрацавалі, што спалілі збожжа.
Гной са стойлаў скідаюць на бетон і шкло, а пасля гэта ўсё разам раскідваюць на палі, у выніку чаго псуецца тэхніка.
Месцамі гной раскідалі проста на высокую траву, хоць яе можна было скасіць на корм.
На працаўнікоў, якія выказваюць сваю нязгоду з дзеяннямі кіраўніцтва, ціснуць і нават ужываюць да іх фізічны гвалт, спрабуюць гэта хаваць. Бальнічных аплочваць не хочуць. Прэтэнзіі за нібыта адсутнасць на працоўным месцы ўзнікаюць да асобаў, нават калі яны былі на абедзенным перапынку.
А ўчасткі пад бульбу калгаснікам наразаюць, не ўлічваючы ні пажаданняў, ні стажу. Бывае, што гной вяскоўцам на палі не ўносяць, а грошы з іх вылічваюцца.
«З заробкамі, перапрацоўкамі… нічога не плацяць. Пасяўная даўно скончылася, а ён прымушае людзей працаваць па 12 гадзінаў. Загадаў пра гэта, пад якімі людзі павінны падпісацца, не пішуць», – кажуць мясцовыя жыхары.
Паводле чутак, прычынаю таго, што Місюк, нягледзячы на ўсе свае «заслугі», дасюль трымаецца на высокіх пасадах, можа быць ягоны «аднакласнік» у адным з міністэрстваў у Менску. Што цікава, узлёт чынавенскай кар’еры былога ветэрынара прыпадае на час, калі намеснікам міністра сельскай гаспадаркі стаўся дзейны кіраўнік аграрнага ведамства і равеснік Місюка Іван Брыло, які ў свой час таксама вывучыўся на ветэрынара. Мы не ведаем, дзе навучаўся кобрынскі чыноўнік, але з улікам таго, што «галоўная і адзіная» ветэрынарная ВНУ Беларусі – Віцебская дзяржаўная акадэмія ветэрынарнай медыцыны, якую скончыў міністр Брыло, нельга выключаць, што акурат ён і ёсць загадкавым апекуном Дзмітрыя Місюка.
З дапамогаю кіберпартызанаў, якія атрымалі доступ да разнастайных базаў звестак уладаў Беларусі, карэспандэнты «Белсату» даведаліся, што несвоечасовая выплата заробкаў – ці не характэрная рыса Дзмітрыя Місюка. За 20 апошніх гадоў на яго склалі дзясятак адміністратыўных пратаколаў, палова з якіх звязаная акурат з гэтым.
Гэтак, Місюк не выплаціў заробкаў працаўнікам за сакавік 2014 года – відаць, быў моцна заняты выбарчаю кампаніяй у дэпутаты Кобрынскага райсавету. У выніку ўтварылася запазычанасць на 712,2 мільёна недэнамінаваных рублёў, або прыблізна $ 72 тысячы. У 2013-м ён зноў жа са спазненнем выплаціў заробак сваім 338 працаўнікам за ліпень.
Двойчы на Місюка складалі пратаколы за тое, што ён не разлічваўся своечасова са звольненымі працаўнікамі. Таксама ў 2013-м ён не падаў органам статыстыкі звестак аб пратэрмінаваных заробкаў і сказіў адпаведныя даныя.
Пры гэтым сабе ў заробках чыноўнік і гаспадарнік не адмаўляе. Гэтак, за 2020 год ён зарабіў у пераліку на долары $ 692 у «Стрыгаве» і $ 19 112 у «Александрыі-Агра». Някепскія месячныя заробкі на больш як $ 1,5 тысячы для намесніка старшыні калгасу. У 2018 годзе ён зарабіў за год больш за $ 12 тысячаў, у 2017-м – больш за $ 10 тысячаў. І гэта ў той час, як працаўнікі калгасаў скардзяцца, што атрымліваюць добра калі чвэрць ягонага месячнага даходу.
Любіць Дзмітрый Місюк і выязджаць за мяжу. Асабліва ў Польшчу і Украіну. А вось адпачывае «моцны гаспадарнік» на курортах Балгарыі.
Раскрываюць міліцэйскія пратаколы і магчымую прычыну звальнення Місюка з пасады намесніка старшыні Драгічынскага райвыканкаму. 21 студзеня 2017 года супрацоўнікі ДАІ спынілі яго, калі мужчына кіраваў аўтамабілем у п’яным стане. Не найлепшая рыса для чыноўніка, які на сваёй пасадзе не прабыў і года.
«Белсат» патэлефанаваў Дзмітрыю Місюку, каб даведацца ягонае меркаванне пра сітуацыю на прадпрыемстве «Гарадзец-Агра» Кобрынскага раёну. Пасля ўдакладнення, ці з Дзмітрыем Місюком мы размаўляем, чалавек які падняў слухаўку, перарваў размову і выключыў мабільны тэлефон.
Людзей, якія таксама пацярпелі ад дзеянняў Дзмітрыя Місюка або ведаюць што-небудзь дадаткова пра яго, просім звязацца з «Белсатам» праз наш чат-бот @BelsatBot у Telegram.
Макар Мыш belsat.eu